uMthunywa
NGEZIHLABEKISAYO zodwa ezilethwa liphephandaba likazulu kusa kwamalanga nanko phela kule iviki lize lengadlangadla yejaha elimajaha mabili elingena kuthintitheke umuhlwa ezihlahleni ngezokuhaya.
Phela lelijaha nguMthulisi Ndlovu ingadlangadla edabuka kwelePlumtree. Kayihayi nje lindoda yenza iziga.
Ukutshelwa yikuncitshwa bakwethu, othanda ukuzizwela ngejaha leli nansi ingxoxo ehlabekisayo phakathi kwentatheli yephephandaba likazulu uArnold Ndlovu (AN) lembongi yodumo le uMthulisi Ndlovu (MN).
AN: Umphakathi uthanda ukwazi mayelana lomsebenzi wakho kanye lomdabuko wakho jahelibanzi?
MN: Mina ngazalelwa esigabeni seSomnene ePlumtree okuyikho engakhulela khona ngasengisiyafunda eLuveve College koBulawayo kanye laseAmhlophe High School. Ezokuhaya ngaziqalisa ngesikhathi ngileminyaka engu-16 ngaqhubeka ngazo kwaze kwaba lamuhla.
AN: Kungani wakhetha ukuhaya njengoba iminengi kangaka imisebenzi engajabulisa uzulu?
MN: Okwenza ngakhetha ukuhaya lokuloba inkondlo yikuthi ngakhula ngithanda ukuhaya ngakho ngabona kungcono ukuthi ngenze umsebenzi engiwuthandayo ukuze ngenelise ukuwenza ngobunono njengoba ngiyabe ngilothando kuwo. Lokhu yikho njalo okwenza ngaloba amabhuku enkondlo ngenhloso yokugqugquzela ezamasiko.
AN: Ukubhala izinkondlo waqalisa nini-ke jaha?
MN: Ukubhala inkondlo ngikuqale ngesikhathi ngihambela izifundo zami zika Fomu 4 esikolo seAmhlophe High School esisePumula East.
AN: Njengomuntu owaqala esasesikolo umsebenzi wezinkondlo usukhiphe ingwalo ezingaki?
MN: Lokhu ngaqalisa ukuloba sengikhiphe ugwalo olulodwa olulesihloko esithi Ubuntu nqaba ngqo. Lolugwalo lulenkondlo eyodwa efundisa uzulu mayelana lokuphathana kuhle, ukuvuselela ezamasiko, kanye lokulwa lenkethabetshabi.
AN: Akutsho jahelihle ukuthi abantu bathini ngomsebenzi wakho?
MN: Abantu esengihlangane labo bayawuthakazelela kakhulu umsebenzi wami njalo bangikhuthaza ukuthi ngiqhubekele phambili ngibalobela ngoba ngiyabajabulisa. Ngalokhu-ke ugwalo balwamukela ngezandla zombili okuyikho okungipha ingwabungwabu yokuqhubekela phambili ngijabulisa uzulu ngomsebenzi wami. Ngokunjalo ngithembisa umphakathi ukumhwatshela ezinye njalo ingwalo ezimbili kungenyanga zingaki.
AN: Ekusebenzeni kwakho jaha yibuphi ubunzima osuke wahlangana labo njalo nkuthazo bani oyipha abalobi lembongi ezisacathula?
MN: Umsebenzi lo engiwenzawo awukho lula ngoba ngikhathazwa yikuswela imali yokukhipha ingwalo zami ngokusemthethweni njalo kwesinye isikhathi ngiyake ngiqilwe ngabanye abantu bethi bayangikhiphela ingwalo zami bacine bengintshontshela umsebenzi wami.
Okunye njalo njengomlobi osasungula kwaba nzima kimi ukuthi ngazi ukuthi nxa ngifuna ukukhipha ingwalo zami ngokusemthethweni ngenza kanjani. Lokhu kwangikhathaza kakhulu. Ngalokhu kubalobi abasasungula ngithi kababambelele bengadeli ngoba kunzima emsebenzini lo.
AN: Ngaphandle kokuba yimbongi lokuloba msebenzi bani owenzayo empilweni?
MN: Ngaphandle kokuba ngumlobi wenkondlo mina ngingumsunguli wenhlanganiso ezimele yodwa ethiwa yiThe Roots Voluntary Charity Organisation encedisa abantu abayizigoga kanye lentandane.
AN: Mazwi bani owabikela uzulu mayelana lohambo lwakho kwezokuloba?
MN: Okwakuqala ngithanda ukubonga abadala abangincedisileyo ekulobeni kogwalo lwami oluphumileyo abagoqela ubaba uPathisa Nyathi loCornelius Kandaba Luphahla okuyibo abangincedisa kakhulu ekukhipheni ugwalo lwami lolu.
