uMthunywa
KULESIKHATHI intombazane nxa isithombile, isilitshitshi phela loyisekazi wayo iyabe ingasamfihleli lutho ngempilo yayo yangasese lapho loba isithe yabona ijaha eseliyithethe inhliziyo.
Iyabika itsho ukuthi ngelakobani ukuze uyisekazi laye acwayisise kabanzi ngomdabu womdeni wejaha ukuthi ngabantu kuzwa kumbe ngokuzinatabana kwabantukazana.
Into eyayiqatshelwa litshitshi yikuthi akalankosikazi lujaha aseyengane laye. Inengi lamantombazana akhathesi abasakudingi konke lokhu, uzwa bethi isiqokoqela yimali, kodwa nxa ufuna ukwakha umuzi oqondene lawe kumele ungabinguvuma zonke.
Ngikhumbula omunye umngane wami engake ngasebenza laye wayengixoxela ngempilo yangakibo, ethi kulobabakazi wakhe owenza amantombazana omdeni wakibo bengendi, ethi wayebaloya.
Ye, ubuthakathi yinto esavela sathi sikhula sathola kuthiwa ikhona kodwa kwezinye izikhathi umuntu uzehlulekela yena sekhala ngokuthi uyaloywa.
Umngane wami wayesenelisa ukukhomba amadoda amathathu ngomnyaka, isikhathi esinengi babefika bemdinga emsebenzini, kulapho engangibabonela khona. Ngathi ngimtshela ukuthi lomunye ayesemkhombile yindoda yomuntu ngoba ngisazi futhi lonkosikazi wakhe loba nje ngangingamjwayelanga. Waphika wemba phansi umngane wami ethi mina ngimenzela ulunya kodwa ngizama ukumeluleka, phela kwakuhela lakimi ngoba ngizele amantombazane.
Ngokuhamba kwesikhathi wacina esezibonela ukuthi ujaha wakhe wayemchithela isikhathi yena elomkakhe, ngase ngimkhumbuza ukuthi sebonile ukuthi akusiyena ubabakazi wakhe omloyayo ukuthi awele ezifubeni zamadoda abanikazi kodwa kuyibutshapha bakhe bokungafuni ukucwayisisa ngomuntu wakhe.
Amadoda amanengi ayathanda ukuhawukela abasifazane loba umuntu esethethe, kwesinye isikhathi behawukela ukuma kwamabele, angaqeda ukukha imbhida esivandeni ahambe umthuthakhaya, ungazabe usambona.
Sengibonile inengi lamantombazana lingaqala ngokulabila inkovu yamaxhegu bavele uthole engani sebephambene, kanti-ke ungaqala losowenu ukwenzela ukuthi lifundisane ukubamba ikhuba angabikhona ozahleka omunye nxa etshiya amabhanga.
Zibuthe ntombazanyana utshiyane lamaxhegu.
Ayixabene.
