uMthunywa
Blessing Moyo
ABALIMI sebexwayiswe ukuba banakelele inkukhu zabo bebone ukuthi zisesimeni esihle ikakhulu ngesikhathi somqando njengoba sesisondela.
UMnumzana Langelihle Nyathi ongu-Animal Specialist uthe ukuze umlimi athole imali kumele anakekele inkukhu zakhe abone ukuthi njengoba umqando usiza useyakhile izilugu ezikhudumalayo ukuze azivikele emqandweni.
“Abalimi kumele bakhele inkukhu zabo izilugu ngoba umqando ulakho ukuzibulala ikakhulu amatsiyane ngoba angenwa ngumqando masinyane.
Abalimi kumele bakhele inkukhu zabo izilugu
“Izilugu zenkukhu kumele zikhudumale ukuze inkukhu zingabanjwa ngumqando. Ngakho abalimi kumele bendlale utshani phansi ukuze kuvikelwe umqando ovela phansi,” kuchaza uMnu Nyathi.
Uqhubeke echaza ukuba umlimi ohlakaniphileyo uhlala esiyadinga ulwazi kungcintshi ezibona ngezifuyo ukuze ahlale elolwazi oluqondane lesifuyo asifuyileyo.
“Thina sinika umfuyi ulwazi lonke aludingayo mayelana lesifuyo asifuyayo ngakho kuqakathekile ukuba ofuyileyo ahlale evakatshela kungcitshi kwezokufuya njalo abalimi abanengi bakhala ngokuthi inkukhu zabo zilezilonda.
Kuloluhlupho umlimi uyabe emele akhangele indawo afuyela kiyo inkukhu zakhe ukuthi yindawo engelamiyane na ngoba izilonda zandise ukuthi zibe ngezemiyane.
Ukudla kwenkukhu
“Okunye okuqakathekile yikuthi umlimi engabona ukuthi inkukhu yakhe ayiphilanga kuhle adinge usizo masinyane anike inkukhu yakhe umuthi umkhuhlane ungakaze umemetheke ucine usuhlasela lezinye inkukhu ezisesilugwini,” kuchaza uMnu Nyathi.
Uphethe ngokuthi ukudla ngezinye zezinto eziqakathekileyo ngesikhathi zonke.
“Abalimi kumele babone ukuthi inkukhu zabo zithola ukudla okunengi okuyikho njalo okuphathisa ekubekeleni kwazo,” kuphetha uMnu Nyathi.
