uMthunywa
Ethel Ncube
INHLANGANISO ye-Agritex isixwayise abalimi ukuthi nxa bebhula umumbu wabo basebenzele endaweni ezomileyo ukuze isivuno sabo singacini siboliswa yibumanzi.
UMthunywa ukhulume lomunye umlimisi osebenzela esabelweni seMatabeleland South, uNkosazana Sazini Dube oveze ukuba abalimi kumele bananzelele lapho ababhulela khona umumbu wabo lalabo abahulula ngezandla. Uthe abalimi kumele basebenzele endaweni engamanzi.
“Abanengi sebeqalisile ukuvuna abanye njalo sebezaqeda, kungakho sixwayisa abalimi ukuthi nxa sebehulula kumbe bebhula umumbu wabo kumele bananzelele ukuthi lapho abasebenzela khona kuhlanzekile njalo komile ukuze bangaphambanisi isivuno sabo.
“Ukubhulela endaweni emanzi kulakho ukuletha umkhuhlane emunjini wakho kumbe ukuwubolisa ucine ulahlekelwa yisivuno sakho. Nxa ubhulela esakeni khangela ukuba isaka lakho lomile njalo lalapho obhulela khona komile.
“Nxa uzabhula kumbe uhulula sinda phansi indawo enkulu evulekileyo lapho ozabhulela khona. Ukusinda ngobulongwe kungcono ngoba ungafaka isamende phansi silakho ukuginqa sibolise umumbu wakho,” kuchaza uNkszn Dube.
Uphethe ngokuthi phakathi kwakho konke abalimi abangakukhangela nxa sebevunile yikuthi babone ukuba akula bumanzi obuthintana lomumbu wabo.
“Ukuze ungalahlekelwa ngumumbu wakho ngesikhathi ubhula, kumele unanzelele njalo unakekele indawo ozabhulela kiyo. Ubone ukuthi yome qha ungakabhuli ukuze isivuno sakho singehli njalo singahlaselwa yimikhuhlane etshiyeneyo ngenxa yobumanzi lobu,” kuphetha uNkszn Dube.
