uMthunywa
Ncekwenhle Ncube
NGENXA yokuthanda imali kulezithandani zeFilabusi esezimpunga esezichithekelwe ngumtshado ngemva kokuxabana zibanga imali yamalobolo.
Ababili laba asebekhethe ukwephula isifungo sabo sokwehlukaniswa yikufa nguMnunzana Kane Gatsha Luphahla loNkosikazi Sibonisiwe Luphahla abakade sebeleminyaka edlula amatshumi amathathu betshadile.
Kuzwakale ukuthi umuzi wababili laba uchitheke ngemva kokuba omunye umntwana walaba ababili elotsholiwe uNkkz Luphahla wasethatha imali wayathenga ibhodo ngaleyomali.
Ekhuluma lentatheli kaMthunywa uMnu Luphahla uchaze ukuthi unkosikazi wakhe wathatha imali yamalobolo wayidla yedwa engambikelanga okwenza wazonda.
“Umama wathatha imali esalobolisa ngayo umntwana wayidla mina ngikhona engangitshelanga. Ngasengizonda ngehluleka lokuzibamba ngamtshaya ngempama,” kutsho uMnu Luphahla.
Uqhubekele phambili ebikela uMthunywa ukuthi ngemva kokulwa kwabo unkosikazi wakhe wabutha impahla zonke waqonda emzini womntanakhe.
“Sengilwe lomkami wathatha impahla zonke wangitshiya ngingelalutho. Sikhuluma nje sengize ngidlela phakathi kwefotsholo ngoba kangilamiganu,” kutsho uMnu Luphahla.
UMthunywa uxhumane loNkkz Luphahla yena ochaze ukuthi indaba yaqala ngesikhathi umkakhe eseqome elinye inina elingumakhelwane wabo njalo ubefuna ukudla imali yamalobolo lalelonina.
“Mina imali okuthiwa ngayidla angiyazi. Ngathatha imali eyasisele esalobolisa ngayo ngayathenga ibhodo koBulawayo ngemva kokunanzelela ukuthi ingaphelela kudlalicatsha likababa.
“Ngathi ngifika ngekhaya ubaba wacela intshintshi ngamupha. Wathi eqeda lapho wangibhaxabula ethi kangihloniphi. Ubengaqalisi ukungitshaya sekuyinto ayijwayeleyo nanko sengaze ngaphela amazinyo ngenxa yokutshaywa nsukuzonke,” kutsho uNkkz Luphahla.
Iphephandaba likazulu lizwe ukuthi ngaphandle kwemali yamalobolo eyadliwa lidlalicatsha uMnu Luphahla ubethatha ukudla okuthunyezwa ngabantwana abaseGoli aliphe njalo nxa umkakhe embuza ngalokho amtshaye.
Induna yakulindawo ithe ibuzwa ngalindaba iveze ukuthi akulampahla ezathathwayo kodwa ukwehlukana behlukana njalo indaba yabo isaqhubekela phambili ithonisiswa.
