uMthunywa
KULOMONGIKAZI wesibhedlela seKwekwe General Hospital obotshwe ngamapholisa ndawonye lejaha lakhe kulandela insolo zokudakisa kanye lokubulala izigulane esibhedlela lesi ngenhloso yokusebenzisa izithupha zabo ukuthatha imali ze-insurance kunkampani yeOld Mutual Life Assurance.
Kubikwa omunye walabo ababulawa ngababili laba uzaphandwa ukuze kuchwayisiswe kusiyaphambili.
Umongikazi lo uRenica Chakabvapasi oleminyaka yokuzalwa engu-30 lejaha lakhe uTakarwa Mugwagwi oleminyaka yokuzalwa engu-48 bancedisa amapholisa ukuchwayisisa nanko phela kulezehlakalo ezifana lalezi ezimbili ezanyakenye.
Ababili laba kubikwa babotshwa ngesikhathi bezama ukuthatha imali ngemva kokufa kukaLee Mazarire (26).
Izihlobo zikamuyi zincedisana lamapholisa ngoLwesibili bezizama ukuphanda ingcwaba lakhe ukuze kudingisiwe kabanzi ngokufa kwakhe.
Kubikwa isidumbu lesi kumele siphinde siyehlolwa ukuze kutholakale imbangela yokufa.
Isikhulumi samapholisa jikelele kuleli uSenior Assistant Commissioner Charity Charamba uthe uMugwagwi wasebenzisa indlela efanayo ukuthatha imali yokufa kwabantu ababili enkampanini le nyakenye.
“Ababili laba basesitokisini njalo njengamapholisa sisachwayisisa ukuze sithole ubufakazi bokuthi uMazarire wafa ngenxa yamaphilisi awaphiwa nguChakabvapasi kumbe hatshi. Ekuhlolisiseni kwethu sesithole njalo ubufakazi bokuthi kulezehlakalo ezimbili ezenzakalayo nyakenye lapho ababili laba abasolwa khona njalo,” kulandisa uSnr Comm Charamba.
Uyisekazi kamuyi uMuzarire uNkosikazi Evelyn Simbanegavi ubikele iphephandaba leHerald ukuthi basemangcwabeni baphanda isidumbu sikaMazarire.
“Siphathekile sibili siphanda ingcwaba likaLee emangcwabeni eKwekwe Section 10. Amapholisa yiwo enza umsebenzi lo ukuze isidumbu sakhe siyehlolwa kutsha kutholakale imbangela yokufa,” kutsho uSimbanegavi.
“Njengemuli sikholwa ukuthi uLee wabulawa ngumama lo ngoba wahamba endlini yakhe wamupha iphilisi esingalaziyo umkhuhlane wahle waqina ngamandla okwabangela ukuthi afe ngemva kwamahola ambalwa.”
Wengezelele wathi, “ULee wake walaliswa esibhedlela seKwekwe njalo yikho lapho abaqala khona ukuzwanana okwenza waqalisa ukumvakatshela ngekhaya esephumile esibhedlela. Ababili laba bamtshontshela isithupha sakhe abasisebenzisa ukuvula i-cash back funeral plan enkampanini yeOld Mutual Life Assurance.”
Kubikwa ababili laba sebebona ukuthi i-policy le isilungile yikho lapho abamnika khona iphilisi leli okucatshangelwa ukuthi lambulala. Ngemva kwalokho baya eOld Mutual besiyadinga imali engange $5 000 bezenza izihlobo zikamuyi.
Icala leli livele ngemva kokuchwayisisa kwabeOld Mutual bona ababikela izihlobo zikaMazarire zona ezathi kazazi lutho ngalokhu.
USimbanegavi uveze ukuthi amapholisa abopha uChakabvanepasi bathola izithupha zabantu abanengi, amafomu e-insurance, imihlobo yamaphilisi ehlukeneyo kanye lamajekiseni.
Abetheswacala bake bamiswa okwesikhatshana emthethwandaba weKwekwe ngoMvulo besolwa ngecala lobuqili.
Ababili laba balakho ukwetheswa amacala okubulala nxa amapholisa angaqeda ukuchwayisisa.
UMazarire kubikwa wabhubha mhlaka 6 kuyonale inyanga. — Herald
