uMthunywa
YiNtatheli kaMthunywa
ZILOKHU zinkemile izakhamizi zesigabeni seMpande eBeitbridge ngemva kokuba omunye umlimisi ebalekise unkosikazi wesinye isakhamuzi benza umasihlalisane okucatshangelwa ukuba sebelenyanga ezine behlala bonke.
Kubikwa uKnowledge Gororo ongumlimisi esigabeni seMpande ubanjwe xhaka lonkosikazi kaHebson Siziba ngeviki ephelileyo ngemva kokuba sekulenyanga ezine ecatshangelwa ukuba uhlala loGororo kodwa yena esala.
Ekhuluma lentatheli kaMthunywa uMnumzana Jone Sibanda uveze ukuthi indaba mlonyeni le isilesikhathi ibakhathaza njalo bezama ukudinga umkhondo wokuba unkosikazi kaSiziba wanyamalala waya ngaphi kukanti uGororo ubethi ebuzwa enduneni ale embe phansi ukuthi uyazi ngomama lo.
“Indaba kaGororo isihluphile ngoba undoda lo ngumlimisi esigabeni sethu seMpande kade wabuzwa ngabantu ngonkosikazi kaSiziba ngoba abanye bembonile endlini yakhe kodwa yena ubekulandula lokhu.
“USiziba uze wayafika khona eZezani lapho amthole esendlini unkosikazi wakhe kodwa yena uGororo ethe kakho,” kulandisa uMnu Sibanda.
UMnu Siziba ebuzwa ngodaba lolu uvumile wathi lwenzakele sibili njalo unkosikazi wakhe uMbuyedzevho Mleya usuke wamtshiya labantwana abancane okwenyanga ezine.
“Unkosikazi wami ngamdinga okwenyanga ezine engitshiyele abantwana abancane omkhulu uleminyaka eyisikhombisa, omncane uleminyaka emithathu.
“Ngaqala ngezwa udletshana lokuthi umlimisi uthandana lomkami ngasengihambisa indaba le enduneni kodwa waphika ngasengisiya eZezani lapho ayesethuthele khona esesuke eMpande ngoba efihla imisebenzi yakhe le.
“Ngithe sengimbonile unkosikazi wami esendlini yakhe wala ukuvula umnyango kwaze kwabizwa amapholisa ayiwo abuya angiphathisa bangena bamkhupha baya laye kubazali bakhe ngahle ngamupha labantwana ngikhuluma nje bakuye.
“Mina unkosikazi wami bengisamthanda kodwa yena uthe kasafuni ukuba sakhe umuzi. Ngikhuluma nje udaba lolu sengiluse edale luzathoniswa mhlaka 13 kuyonale inyanga,” kulandisa uMnu Siziba.
UMthunywa ukhulume njalo lomlimisi Gororo wathi kalabudlelwano lentathelizindaba.
“Kangilani lani ntathelizindaba kade lilokhu lingifonela,” kutsho uGororo equma ucingo.
UMlisa wakulindawo uMnumzana Liberty Mleya ebuzwa ngodaba lolu uvumile wathi lwenzakele.
“Udaba lomlimisi lwenzakele sibili kodwa izenzo ezinje azimelanga zenzakale ngoba ziphambanisa inhlalakahle lobuntu babantu.
“Indaba le iyayangisa kakhulu kuzakhamizi njalo beluke lwaba sedale kodwa uGororo waphika sokuze kwavela sobala lapho esebanjwe xhaka amapholisa esephathisile,” kulandisa uMnu Mleya.
