uMthunywa
Ngezani indlebe zensitha kowesifazana?
KHULU ngilethemba uphilile. Ngithanda ukubuza ukuthi lokhu abakubiza besithi ngamalebe kusetshenziswani sibili emacansini. Umkami ulawo kodwa mina angazi ukuthi ngenzeni ngawo. Nceda Khulu akula owangifundisayo ngezemacansini.
Impendulo
Habe, mzukulu kuthiwa zindlebe zabogogo emacansini. Indlebe ngezokuzwa mzukulu phela, ngezokuthi uzidlaladlalise kamnandana umama aze azizwe ukuthi usesemathandweni. Uyakubambabamba ngezandla ngesikhathi selilungisela ukunikana uluju lwemvelo. Ungaqeda ukuwaqhwebaqhweba lokuwadlalisa ngokhulu engakangeni phakathi, uzezwa umama etshintsha ukuphefumula esengene emathandweni, uhle ubekwazi ukuba sekufuneka ukhulu angene, ubone umama esembamba emfaka phakathi. Indlebe zikagogo ngezakho emacansini mzukulu, yinyama ezimabotoboto, ezimnandi ukubamba. Lawe nje ungathinta ukhulu uhle ame mpo. Zikholisele ukuwadlalisa, ngizezwa ngawe kwelizayo.
Induku yomkami kayisavuki
Khulu linjani? Ngitshade nyakenye ngenyanga kaNcwabakazi, konke bekuhamba kuhle endlini kwaze kwafika inyanga kaMpalakazi lapho umkami athe kimi kenelisi ukuya lami emacansini ngoba ubuya ekhathele emsebenzini. Umkami usebenza esitolo. Uhlupho yikuthi kusukela ngaleso sikhathi kuze kufike khathesi kangithinti, loba nje ukunganga. Induku yakhe layo kayisavuki. Mina ngileminyaka engu-27 yena ule-28. Umkami kafuni lokuyabona udokotela, angisakwazi ukuthi ngithini. Ngicela ungeluleke Khulu, ngikhala nsukuzonke ngizibuza imibuzo engapheliyo.
Impendulo
Mzukulu, uhlupho lwakho, ululethe lulamakhanda amabili, okokuqala uthi umkakho uyabe ediniwe, esithi usebenza nzima esitolo. Okwesibili lihloka elibuthundu, ngakho ke mzukulu, kuyadingeka ukuba umkakho akutshele iqiniso ukuze lawe umncedise. Ukudinwa nje kodwa akungeke kwenza induku ingavuki, kutsho ukuba kulesenzo esikhona. Nxa umkakho engazwisisi kuhle ubikele omalumakhe bazame ukubonisana lomzukulu wabo. Uyabatshela nje uthi “Malume imbiza ayisabekwa lapha ekhaya lingaze litshone ilanga sesilala ngendlala, ihloka alisagamuli inkuni zokupheka.” Labo bazahle babekwazi ukuba uthini, bazame ukukulungisisa lomzukulu wabo. Kwesinye isikhathi hlalani phansi lobabili lixoxisane ngakho, ungavuki ngolaka, uzacina ekubonisa iqiniso ukuze lilungisise udaba lwenu lonke. Wena wedwa ungazibuza kodwa impendulo eqotho kufanele ivele kuye mzukulu.
Bathi mubi ebusweni ngingamthathi
Khulu ohloniphekayo. Siyabonga ngokusinceda kuhlelo lwakho. Bengilombuzo owodwa nje kuphela. Kulani ngingathatha inkazana engiyithandayo kodwa abangakithi besithi imbi ngingayithathi. Abangane bami labo bathi umntwana lo mubi kakhulu kangifithi kodwa mina ngiyamthanda njalo angibuboni ububi bakhe Khulu. Ngenzeni ngoba kunengi umntwana lo angenzela khona okwenza ngimthande ukwedlula abanye bonke kugoqela leziqabhobho ezigcwele ezitaladeni zakithi lapha. Umama yena uthi kafuni ngitsho khona ukumbona lumntwana ngoba mubi, ulitshapha njalo kagezi. Ngenzeni Khulu ohloniphekayo ngiyaludinga usizo lwakho.
Impendulo
Mzukulu, bonisana labangakini ngothando olalo komunye wakho. Babonise zonke indlela baze bakholwe sibili njalo ubabonise ukuthi “inkiwane enhle ibolile.” Kungenzeka ukuba uphaphatheke usiyadinga umuntu omuhle kanti ingaphakathi yakhe ibolile. Futhi mzukulu umfazi uyazithathela wena, yisinqumo sempilo yonke, ngakho kuyadingeka ukuba wenze into ekusuthisayo, lozayimela kusasa. Yenza isinqumo esihle kuwe mzukulu ngoba nguwe ozahlala laye. Babonise bonke abakini, livumelane.
Amadoda agcinelani uzipho olulodwa
Khulu ngiyindoda eleminyaka yokuzalwa engu-28. Umbuzo wami umi kanje. Kungani abanye abesilisa begcina uzipho lukacikilicane lulude. Balusebenzisani? Mina angikwazi ngiya ngibone abangane bami belozipho olulodwa olude ngizibuze ukuthi kanti ngolwani kodwa angikaze ngibabuze ngoba ngiyesaba ukuhlekwa.
Impendulo
Mzukulu, akukho ukugcina inzipho esintwini njalo akula okukhulumayo. Kudala sisakhula kwakuthiwa inzipho zibamba ingcekeza, lamhlanje lokhe kunjalo. Abantu khathesi sebelenkolo ezinengi abakholelwa kuzo. Mhlawumbe kukhona abakholelwa kukho ngenzipho lezi kodwa, esintwini, hatshi mzukulu akulasitsho ngitsho. Inzipho sasizibonela kubomama bemahofisini sisakhula hatshi kubobaba. Sekufana lokufaka amadikazi labesilisa sebewafaka nje kungabi ndaba zalutho, lanxa esintwini kungekho.
Umkami ulobukhwele
Khulu umkami kafuni ukuthi ngikhulume lamanye amadoda. Ulobukhwele obesabekayo okokuthi nxa sihamba ezitaladeni angenelisi khona ukubingelela abesilisa engibaziyo.Ngingavele ngibonakale ngikhuluma lowesilisa ongasiso sihlobo sami ufika angitshaye endlini ngilale sengingovuza igazi. Angiboni ukuthi yimpilo le. Ngingenzani Khulu, yena uhlala ekhuluma labesifazane njalo ulabanye abangane besifazane akhuluma labo kuWhatsApp.
Impendulo
Awusatshongo mzukulu ukuba isisusa salesisimo savela kutheni, kungavele wayenje lingakathathani kumbe nje yisenzo esivele selihlezi lonke, njalo nxa sivele selilonke kuyini okumenze watshintsha? Kuqakathekile mzukulu ukuba uhlale phansi lowangakwakho libonisane ngesenzo ongasizwisisiyo. Induku kayakhi muzi, njalo lawe kawungeke wahlalela evalweni futhi. Bonisanani njalo lawe umphumele ecgekeni ukuba ukukhulumisana lowesilisa akutsho ukuba selithandana. Wena khangela ukulungisa indaba yakho hatshi ukuba laye ukhulumisana labesifazana.
Umkami uliqhude embhedeni
Khulu ngicela ungincede angazi ukuthi ngenzeni ngejaha lami eliliqhude embhedeni. Nxa siphakathi kokunambitha uluju lwemvelo uyaphangisa ukuqeda mina ngingakasuthi. Ngingathi vele akumthathi imizuzu emibili ukuthi aqede manje mina ngiswele ukuthi ngimtshele njani ngoba yena uyabe esesuthi engaselandaba lokunengi esezifunela ukulala nje. Nceda Khulu, ngenzeni?
Impendulo
Mzukulu, ukunambitha uluju lwemvelo yimpilo enhle sibili. Kuyadingeka mzukulu ukuba wena lomkakho lixoxisane ngendaba zemacansini, lawe umbikele ukuba ibhasi iyaphangisa ifike esilindweni wena ungakakholisi uhambo. Hlala phansi laye libonisane ngale indaba mzukulu laye uzazama ukuthi abekwazi ukuthi ukutshiya ulephango. Kwesinye isikhathi umuntu wabantu wenzela emnyameni, uyabe engazi ukuthi wena usafuna uhambo luyephambili. Kwesinye isikhathi okokuqala kuyaphangisa kodwa okwesibili hatshi mzukulu kuyabe sekuqakezwa ukuze liphume idlozi lakhona, lawe wobamazi owakho ukuba uluju luphanga luphume ekuqaleni kodwa kuhladla lesibili hatshi liyakholisa lonke. Konke mzukulu khulumisanani kabanzi ngale indaba lizathola isivumelwano esihle.
