uMthunywa
YiNthatheli kaMthunywa
KUSIGA esisansumansumane esitshiye izakhamizi zenkomponi yeQueens Mine eNyathi zitshe amathe, kulabafundi abane abadobha amaqanda esikhwehle okubikwa aphenduka abazinyoka okwacina kubangela ukuthi omunye abeyimpumputhe, uMthunywa ukuzwile lokhu.
Kufike endlebeni zephephandaba leli ukuthi isiga lesi senzakale emavikini amathathu adluleyo lapho abafundi labo abenza ugwalo lwesine esikolo seQueens Mine Primary abadobha amaqanda la bevela esikolo.
Kuzwakale ukuba ngemva kokudobha amaqanda la omunye wabo wenyela intamo elokhu itshekile kuze kube lamhlanje kuthi omunye waba waba yimpumputhe lanxa nje kumfikela ngemva kwesikhathi.
Umfakazi oqotho oziveze ngokuthi nguMnumzana Leeroy Nkomo ubikele iphephandaba likazulu ukuthi omunye wabafundi laba kasaboni kuhle emehlweni.
“Abafana laba bafunda ugwalo lwesine njalo bathi bephuma esikolo kuviki edluleyo badobha amaqanda emtoreni (enhlabathini ekhitshwa emgodini) bawabelana,” kutsho uMnu Nkomo.
Kuzwakale ukuthi abafana laba sebabelane amaqanda la bamangala sebebona omunye wabo esetsheke intamo njalo isisala ukuqonda.
UMthunywa uphuthume wayafika esigabeni lesi wezwa ukuba kuliqiniso ukuthi kulabafundi abadobha amaqanda behlelwa ngamashwa ehlukeneyo.
Abafundi abaxoxe loMthunywa baveze ukuthi kulomfundi owenyela intamo (ibizo silalo) ngemva kokudobha amaqanda la.
Kuvele njalo ukuba omunye wabo wahamba lamaqanda amabili ngakibo wafika wawathukuza ebhuthini yemota eyafayo.
“Ngelilandelayo ilanga wathola esecacadile njalo sokulenyoka ezimbili phakathi kwemota kodwa isimanga saba yikuthi wathi ngemva kokuzibona wahle waba yimpumputhe lanxa lokhu kumenza kwezinye izikhathi,” kuchaza omunye umfundi.
Kuzwakale njalo ukuba umbalisi womfundi lo owayengasabonisisi nguye owananzelela ukuthi kukhona okwakutshaya amanzi.
“Umfundi lo walandisela umbalisi wakhe ngokwakwenzakale kuye njalo laye kazange athande ukupholisa amaseko ngoba wahle wayabikela umphathisikolo ngendaba le,” kuqhuba uMnu Nkomo.
Kuzwakale njalo ukuthi umfundi lo kusukela ngalelolanga impilo yakhe isiguqukile ngoba kasenelisi ukuyadlala labanye abantwana ngoba uyabe ebona sengathi lezonyoka ziyamlandela njalo lebusuku kasabuquthi ubuthongo ngoba uyabe ezibona zimlanda.
Iphephandaba leli like laxoxisana lomunye umbalisi ofundisa kulesi isikolo ofakaze ukuthi lindaba okwamanje isayimfihlo yesikolo.
“Kulendaba enjalo esikolo kodwa ngesaba ukuxotshwa umsebenzi sengikutshele ngayo kungcono ukhulume lomphathisikolo,” kutsho lumbalisi.
UMthunywa uvakatshele esikolo lesi wadingisisa kabanzi ngodaba lolu kumphathisikolo uNkosazana Gijima yena owale ukukhuluma ngendaba le.
“Angazi lutho ngendaba okhuluma ngayo mhlawumbe yikuthi akwenzakalanga phakathi esikolo,” kuchaza lumphathi.
Imizamo yokuxhumana lonina walumfundi yehlule ngoba kuzwakale ukuthi ufundisa kwesinye isikolo esisemaphandleni esabelweni seMatabeleland North.
Intatheli zibone umfundi lo owatsheka intamo yena ovumileyo ukuba isimo lesi samehlela ngemva kokudobha amaqanda lawo.
UMqondisi wezemfundo esabelweni seMatabeleland North, uNkosikazi Boitatelo Mnguni uthe udaba lolu kalukafiki kuye.
“Indaba le bengingakayizwa kodwa ngithanda ukuxwayisa abafundi ukuthi bangahambi bedobha izinto ngoba kuyenzakala ukuthi zibe zisetshenziswa imisebenzi engalunganga,” kuphetha uNkkz Mnguni.
