uMthunywa
YiNtatheli kaMthunywa
“Ngiyavuma ukuthi ngilecala. Ngayitshontsha ifoni ngoba ngangihlaselwe ngamadimoni . . ..”.
La ngamazwi omunye umphurofethi we-Old Lobengula omiswe phambili komthethwandaba evuma icala lokutshontshela umzalwane oyisiphofu.
UGodfrey Mabhena, oleminyaka yokuzalwa engu-50, ongumphurofethi odumileyo elokitshini le-Old Lobengula wenze ihlazo ngokutshontshela omunye wabazalwane bebandla lakhe i-cellphone yomhlobo we-Huawei X3.
Ngokwenza lelicala, uMabhena uzapika ejele okwenyanga ezintathu.
UMabhena umiswe phambili komthethwandaba we-Western Commonage esetheswa icala lokweba umakhalekhukhwini kaPatience Makondo, oleminyaka engu-19.
UMantshi uNkosazana Tancy Dube uzwe ukuba lokhu kwenzakala ngenyanga edluleyo mhlaka 20.
Inkundla yaziswe ukuba mhlaka 20 kuLwezi, ngehola lakuqala emini, uMabhena wafika endlini kaMakondo ejonge ukuzokhulekela ubaba kaMakondo, kukanti wayeleqhinga lokweba.
Umtshutshisi wodaba uMnumzana Tapiwa Solani uthe:
“Ngesikhathi sika-1PM, umsolwa wafika endlini kamamangala ezokhulekela uyise obulawa ngamehlo. Umsolwa wabopha iqhinga lokuthi atshontshe ngoba esazi ukuthi lo amkhulekelayo kaboni emehlweni. Watshontsha i-cellphone ebiza i$200. Ngaleso isikhathi umamangala wayengekho endlini.”
Umtshutshisi uSolani utshele inkundla ukuba uMabhena wabotshwa ngamapholisa ngemva kokumthola esetshwathike i-cellphone le phakathi kwesaka endlini yakhe.
