uMthunywa
KULOMFUNDISI webandla leCelestial Church of Christ eNigeria owenze indodana yakhe eleminyaka yokuzalwa engu-9 isihluku nanko phela uyibophele ku-altare ngamaketane okwesikhathi esedlula inyanga lengxenye ithi ifuna ukuxotsha umoya omenza atshontshe.
Umfundisi lo uFrancis Taiwo oleminyaka yokuzalwa engu-40 ubotshiwe njalo wetheswa icala lokuzama ukubulala lamanye amacala.
UFrancis ubophe indodana yakhe ngamaketane okwesikhathi esedlula inyanga njalo kubikwa ubemncitsha ukudla okucine kubangela ukuthi aqaleke.
Umamangala wephulwe kulelilangabi ngabeNigeria Security and Civil Defence Corps kanye lamapholisa ngemva kokubikelwa yizakhamizi ezikhathazekileyo ngesihluku lesi.
Amapholisa abophe njalo lonina kamamangala, uKehinde ngecala leli.
Umamangala ofisa ukuba ngudokotela angakhula uthe usola uyise ngesenzo sakhe sokutshontsha.
Uthe: “Kuliqiniso ukuthi ngatshontsha imbiza elomsobho ngekhaya lakubomakhelwane.
“Lokhu kubangelwa yikuthi ubaba uyehluleka ukunika umama imali yokudla. Ngesikhathi bengibophile ubaba lomama babengipha ukudla kabili ngelanga. Kodwa kwezinye insuku babengangiphi ukudla.
“Ngifuna ukubuyela esikolo ngoba ngifuna ukuba ngudokotela ngingakhula.
Kangifuni ukubuyela endlini kababa,” kutsho umamangala. —Ubulembu
