uMthunywa
Ethel Ncube
INJABULO iphenduke izinyembezi kwabanye abafundi besikolo seDadaya High eZvishavane ngesikhathi omunye akade bedlala laye etshaywa ngamagetsi bedlala ibhola ngempelaviki.
Umuyi uTanaka Chihwendo oleminyaka engu-15 yokuzalwa kubikwa wayedlala labanye abafundi ibhola duzane lezindlu zabo zokuhlala esikolo wasethinta intambo yamagetsi ebilenga yahle yamtshaya wafa.
UMthunywa uzwe ukuthi abafundi laba babedlala phansi kwentambo ezazilenga, uthe ephakathi komdlalo wasebamba intambo lezi watshaywa ngamagetsi.
Kubikwa ababalisi bazama ukumgijimisela esibhedlela seZvishavane kodwa bathi befika kwathiwa usedlule emhlabeni.
Indaba le yabikelwa amapholisa ahamba ayakhangela lapho okwenzakala khona ingozi le.
UMthunywa uxhumane lesikhulumi samapholisa eMidlands uInspector Emmanuel Mahoko oveze ukuba indaba le isadingisiswa.
“Udaba lolu sisaluphenyisisa. Sikhuthaza labo abaphatheka ngempahla ezifakwa kuzakhiwo zomphakathi ukuba babone ngazo zonke izikhathi ukuba azilangozi njalo zivikelekile,” kuphetha uInsp Mahoko.