Uncategorized

Umfundi ugwazwa amathangazi afe

10 Jun, 2021 - 00:06 0 Views
Umfundi ugwazwa amathangazi afe uAbednico Ncube

uMthunywa

Ethel Ncube
ZIKHAKHAMELE izakhamizi zeWarringham koBulawayo ngemva kokutholakala komfundi weSigodini Agricultural College efile, egwaziwe.

Kubikwa isidumbu somfundi lo, oleminyaka yokuzalwa engu-25 sitholakale ngempelaviki eceleni komgwaqo sikhangeliswe phansi, sigwazwe emuva kunye lamathangazi njalo sivalwe ngamahlahla.

Kubikwa umuyi wasuka ngakibo esiyadlala ibhola eFamona labangane wacina ukubonwa ngumngane wakhe koMac’s Garage esiyagada esebuyela eWarringham. Kuthe ngemva kwesikhatshana umngane wakhe wamfonela kodwa wamtshela ukuba ulokhe elinde izimota zokuya ngakibo.

Kubuye kwavela njalo ukuba ngelanga elilandelayo umngane kamuyi wezwa amahemuhemu okuba kulomuntu ofileyo eduzane komgwaqo wagijima wayakhangela wathola ukuba umngane wakhe usetshonile njalo umzimba wakhe uvalwe ngamahlahla.

Indaba le yabikelwa amapholisa, isidumbu sasiwa esibhedlela se-United Bulawayo Hospital ukuyahlolwa.

Intatheli ixhumane lesikhulumi samapholisa koBulawayo, uInspector Abednico Ncube oveze ukuba lindaba ifikile kuye.

“Kuliqiniso ukuba umfundi lo utholakale efile ubuso bukhangele phansi njalo egwaziwe.

“Amapholisa adinga umuntu ongaba lolwazi lokuba umfundi lo angabe ebulewe ngubani kumbe ongabe elolwazi lokuthi wagada yiphi imota,” kutsho uInsp Ncube.

Isikhulumi samapholisa siphinde njalo saxwayisa uzulu ukuthi kusukela mhlaka 7 Nhlangula akusavunyelwa ukuthi umuntu abonakale ethwele loba yisiphi isikhali esiyingozi.

“Kusukela mhlaka 7 Nhlangula akusavunyelwa ukuthwala izikhali eziyingozi, labo abazatholakala bezithwele bazabotshwa futhi bavalelwe ejele inyanga ezintathu,” kuphetha uInsp Ncube.

Share This:

Sponsored Links