uMthunywa
Ngitsho lasemandulo, ijaha lalibona intombi, ilithathe inhliziyo, uzwe ithi nxa isitshela osowabo ekweluseni itsho ukuba ibone intombi yakoZibanibanyana, iyisiphalaphala nxa ihleka uthotho lwamazinyo lucwebezela okwamanzi emthonjeni ekhanyiswa ngunyezi.
Ujaha alwisane laye ngamazwi langezenzo aze ayekhonjwa batshade. Kumaviki ambalwa adluleyo ngibale kumaphephandaba njalo ngisizwa lemisakwezweni, bakhona abamabandla asebekwenza umkhuba wesonto ukwendisa abantwana kumakhehla ebandla.
Ikhona ingane ekade iphiwe ixhegu yazithwala ngebhadi elikhulu yatshona ingane itshiya layo ingane encane.
Kuvamile kakhulu emihlubulweni yasempumalanga yalelizwe lakithi, ngizwe igazi lami litshwaqa, ngathukuthela ngakhukhumala njengonanane esuthi amathuku.
Ngidlulisa isicelo sami kuHulumende ngithi kakwenze kube yinkalakatha yecala agwetshelwe intambo ozatholakala ephathekile ekwendiseni amantombazana amancane. Uthando lufana lethumba, lumila lapho oluthanda khona.
Kambe nxa untombazane ezaphiwa umdodovu wekhehla kuthiwe ngumkakhe, yena ekhangelele ukuthi ngukhokho wakhe kuthiwe mthande nguye osengumkakhe, yikho lencwadi engcwele iyakufakaza ukuthi yekelani abantwana baye kuJesu hatshi emaxhegwini.
Nxa uzanikela umntwana exhegwini suyephule amalungelo akhe ikakhulu suhle waquma isikhathi sakhe esesikolweni, kasayikuba yilokhu akade ezaba yikhona eseqedile izifundo zakhe.
Lalawo maxhegundini aficwa esenqwethela lezingane kababanjwe bathelwe ibhadiza bahle bahlale bezinkabi.
Ungabona ungumuntu wesilisa uphiwa umfazi kukhona okungaphelele ngawe, emasontweni bakhona asebedlala ngomoya bezipha abantwana bebenza abafazi uzwe bethi kukhulunywe ngumoya lapho lowo moya ngiphikisana lawo uyabe ungowokuzikhandela umuntu esehluleka ukukhombisa, akhonjwe nanko abafazi bebanengi kangaka, abesegegelela imbuya etshiya ulude.
Mhlobo wami umfazi uyakhonjiswa, kawumphiwa.
Ayixabene.
Umlobi ungamthinta ku: 0714355641
