uMthunywa
Thokozile Mbedzi
ZILOKHE zinkemile izakhamizi zesigabeni seSiamankuyu, eBinga ngemva kokuba umntwana oleminyaka eyisifica munwe munye ebulawe yingwenya ngeviki ephelileyo.
Isehlakalo lesi senzakale eChipamba Fishing camp emfuleni uZambezi ngesikhathi uOption Arthur Muzamba ewatsha lonina uJuliet Mupande emfuleni.
Ekhuluma lentatheli kaMthunywa uLaizer Mudenda uthe behlelwe liyezi elimnyama esigabeni sabo.
“Kwehle iyezi elimnyama esigabeni sethu, umntwana lo ubehambe lonina eChipamba Fishing camp esiyawatsha impahla emfuleni uZambezi.
“Kukhanya unina uthe elokhu ephathekile ngokuwatsha umntwana njengoba ilanga litshisa likhipha inhlanzi emanzini wasenakana ukuthi ayegeza wasuka waya bucwadlana lalapho unina ayewatshela khona wafika waqala ukugeza.
“Ngemva kwemizuzwana nje unina uzwe umsindo wamanzi wabona esukuma emfuleni emanengi okumangalisayo esiyangaphandle komfula eqonda lapho obekugezela umntanakhe.
“Esathi athi mehlo suka wabona umntanakhe esehudulelwa emanzini yingwenya. Unina womntwana watshaywa luvalo wesaba ukuba angene emanzini akhuphe umntanakhe wagijima wabuyela emzini wakhe wayabikela umkakhe labomakhelwane,” kulandisa uNkszn Mudenda.
Basuka bonke babuyela emfuleni bafika bangena emanzini bamdinga bamswela kwaze kwatshaya ihola lesikhombisa ebusuku.
Kusisa mhlaka 18 ekuseni ngehola lika 4 enye indoda yathi isiyakhangela amambule ayo intsheza ngesikepe yezwa kulolutho olugudla isikepe sayo ngaphansi yasikhangelisisa yabona ukuba yisidumbu somntwana ongumfana.
Kubikwa indoda leyo yahle yasifaka esikepeni yaphuma laso emfuleni.
Indaba le yahle yabikelwa amapholisa.
Isikhulumi samapholisa esabelweni seMatabeleland North ulnspector Glory Banda ebuzwa ngodaba lolu uvumile wathi solufikile ehofisini yabo.
“Samukele umbiko womntwana oleminyaka engu-9 obulewe yingwenya ngesikhathi egeza emfuleni bucwadlana lalapho obekuwatsha khona unina,” kuphetha uInsp Banda.
“Sixwayisa uzulu ukuba ngaso sonke isikhathi abantwana kabahlale bevikelekile ukuze singalahlekelwa yimpilo mahlayana njengalokhu,” kuphetha ulnsp Banda.
