uMthunywa
YiNtatheli kaMthunywa
OMUNYE wezizalwane zakuleli esimhloniphayo lamuhla owayengumsekeli kaMongameli welizwe, uDokotela Joshua Mqabuko Nkomo wahlukunyezwa, kodwa walwisa ukuze ilizwe likhululeke embusweni waseBritain.
Ilifa elatshiywa nguChibwechitedza, njengoba wayesaziwa ngaleli ibizo, lihle kakhulu. Ngempela liqhawe elizahlala likhunjulwa.
Abezombusazwe, labamasonto, ezemfundo kanye labamabhizimusi basahlabela izithakazelelo zempilo eyaphilwa nguMdala Wethu.
Inkokheli zeZanu-PF zachaza uMsekeli kaMongameli njengendoda eqotho eyayizimisele ukuhlomisa abantu bonke beZimbabwe ngaphandle kolimi, imvelaphi kanye lokholo lwabo.
Umeli wephalamende weGutu Central uKhomuredi Lovemore Matuke uthe uDkt Nkomo wayemela abansundu njalo wayefuna ukubona impumelelo empilweni yabantu abansundu ifana leyabamhlophe.
“Le yindoda eyaletha ukubambana njalo waba nguye obambe isibane empilweni zethu. Nxa singakhumbula nguye loMongameli uMugabe abakha iUnity Accord ka1987. Ukubambana kweZanu le PF Zapu kwaba licebo lakhe.
“UFather Zimbabwe waletha ukubambana, okumele sikugcine njengesizwe. Kungayisiyo lindoda, ngabe siphakathi kokulwa lokudonselana,” kutsho uKhmrd Matuke.
Uthe uDkt Nkomo wafaka isisekelo soMvukela wesithathu owawungowokwabelana komhlabathi kanye lokuhlomisa abantu kwezomnotho.
“UMdala wethu nguye owaqala umehluko njalo nguye owaqalisa ukuhlaliswa kutsha kwabansundu abanengi bengakaboni ukuqakatheka kwayo. Abantu abanengi kumele bambonge njengoba sebehlezi emhlabathini ovundileyo, owawungowabamhlophe kuphela. Ngikhuthaza intsha ukuthi kube khona ekufundayo empilweni yalindoda ukuze bangathengisi ilizwe emazweni aseNtshonalanga njengoba uDkt Nkomo kanye labanye bengalitholanga lula,” kutsho uKhmrd Matuke.
UMgcinisihlalo wabalweli benkululeko eMasvingo uKhomuredi Tendeukai Chinooneka uthe kunzima ukuthi abalweli benkululeko eMasvingo bakhohlwe ngomuyi uDkt Nkomo ngoba watshiya ilifa esabelweni seMasvingo.
“Wayeyindoda elungileyo, abanye bethu abahamba empini simkhumbula njengengxenye yeNational Democratic Party (NDP), Zapu ngemva kwesikhathi wangena kuZanu-PF. Simkhumbula ngenxa yomoya wakhe wokulingana ngoba wayefuna umhlabathi wabelwane ngokulinganayo,” nguKhmrd Chinooeka lowo.
Uqhubekele phambili wathi, “Sikhumbula lindoda ngokuzwisisa kwayo ngokubambana. Sizalandela amacebo ayo asikhumbuza ukuthi sivikele inkululeko yethu. Walwela ukuthi ilizwe liphenduke kubanini balo. Kumele simbhadale ngokugcina njalo sivikele inkululeko yethu.”
UMfundisi weApostolic Faith Mission uGarcia Mundondo uthe amasonto eMasvingo abonga umuyi owayenguMsekeli kaMongameli ngoba wenza abantu bakhonze bekhululekile.
“Lamuhla sikholisa ukukhonza sikhululekile ngenxa yamadodana lamadodakazi agoqela uDkt Nkomo. Besimazi njengoMkhristu, owayelandela imithetho yesiKhristu njalo siyajabula ngoba wenza ukukhonza kwethu kwaphumelela. Bekungasoze kubelula kumaKhristu ukukhonza,” kutsho uMfundisi uMundondo.
Uthe uDkt Nkomo ufanana loJesu Khristu, wazinikela ngokutshiya imuli yakhe esiya empini ukuyavikela abantu bakhe kulokuthi ahlale emzini wakhe aphandele imuli yakhe.
“NjengoJesu Khristu, uDkt Nkomo wanikela impilo yakhe waya empini etshiya imuli yakhe ukuyanceda abantu baseZimbabwe ukuze basuke ebugqilini buka Ian Smith njengalokhu okwenziwa nguJesu lapho esiza abantu ebugqilini bukaSathane,” kutsho uMfundisi Mundondo.
UMqondisi wezemfundo esabelweni seMasvingo uMasvingo uMnumzana Zadius Chitiga uthe uyazehlisa ngenxa yobuntu bukamuyi owayengumsekeli kaMongameli lokuthi wayesekela imfundo elizweni ngokulungisa ama-scholarships.
“Imbali yemfundo kuleli iyabe ingaphelelanga nxa kungakhulunywanga ngalindoda, lamuhla inengi labantwana kulesi isabelo sebethole uncedo oluvela kuJoshua Mqabuko Nkomo Scholarship lokhu kutsho ukuthi ukuzwisisa kwakhe imfundo kutsho okunengi,” kutsho uMnu Chitiga.
“Angabe wabhubha lapho sisadinga ukukhokhela kwakhe kodwa iqiniso yikuthi wayengumnqobi njalo imfundo yeMasvingo ilapho ekhona ngenxa yakhe,” kuphetha uMnu Chitiga.
