uMthunywa
YiNtatheli kaMthunywa
KULOMCUPHI weGokwe ofe ngemva kokuhlaselwa ngabantu abangaziwayo ehamba lomunye asebenza laye besanda kutshayisa emsebenzini.
Umcuphi lo, uLlyod Muchaiona obesebenza kuhlangothi lweCriminal Investigations Department (CID) eGokwe ufe kubangelwa yikopha kakhulu.
Umngane kaMuchaiona, uFanuel Chirori yena usesimeni esibi kulandela ukugwazwa ihlombe kunye lomlenze.
Isikhulumi samapholisa elizweni uAssistant Commissioner Paul Nyathi uvumile ukuthi lokhu kwenzakele.
“Mhlaka 19 Mbimbitho 2021, ipholisa leGokwe elalihamba lomngane walo njalo babesiya ngekhaya besuka emsebenzini, lagwazwa ngengqamu emlenzeni ngesizatho esingachazwanga wahle wafela lapho,” kutsho uAss Comm Nyathi.
“Umngane wakhe wagwazwa ehlombe lesandleni sokunxele kanye lasemlenzeni wesandleni sokudla andubana agijinyiselwe esibhedlela,” kutsho yena.
Amapholisa alokhu edinga laba abantu abahlasela ipholisa.
“Abetheswacala lokhu bengakabotshwa. Ongabe elolwazi ngecala leli angathinta amapholisa aseduzane laye kumbe abeNational Complaints Desk ku (0242) 703631 kumbe 0712800107,” kutsho uAss Comm Nyathi.
