uMthunywa
UKUKHWEZWA kwentengo yempahla etshiyeneyo kumaviki ambalwa edluleyo kutshiye abathengi bedidekile amakhanda. Ukukhwela kwentengo lokhu kubangelwe yikwehla kwesisindo semali yakuleli nxa iqathaniswa lemali yakweleMelika.
Konke lokhu kungumthwalo onzima emahlombe abantu nanko phela kusobala ukuthi ukukhwela kwempahla sokukhona njalo kuyaphambili, ngeke kutshintshe lula.
Okuthena amadolo kakhulu yikuba ukudla okuyikho okudingwa ngabantu ezindlini nsuku zonke okubalisa impuphu, amafutha, itshukela, isawudo, irayisi kanye lesinkwa intengo yakho isiphindwe kanengi nengi.
Phakathi kwabo bonke lobu ubunzima, ziyabalwa izisebenzi esezingezelelwe iholo ngabaqhatshi bazo ukuze lihambelane lokukhwela kwentengo yempahla etshiyeneyo.
Ukukhwezwa kwentengo okungalangcazelo kwenza impilo yezisebenzi kanye lezimuli zabo ibe nzima njengoba bengasenelisi ukuthenga ukudla.
Indlela osomabhizimusi bakuleli abaqhuba ngayo amabhizimusi imbi nanko phela imali yakuleli ingavele yehle isisindo nxa iqathaniswa lemali yeMelika impahla etshiyeneyo layo sokumele ihle ikhwezwe intengo khonapho khonapho. Kambe kungaba yiyo na indlela yokuqhuba amabhizimusi?
Kuqakathekile ukuthi abamabhizimusi nxa bekhweza intengo yempahla yabo baqale bacabangisise ngesenzo sabo njalo bacabange langobunzima abantu abaphakathi kwabo.
Mhlawumbe ukuze osomabhizimusi laba benelise ukukhweza intengo ngendlela eqotho kumele abathengi bake bekele ukuthenga impahla ezitolo nxa intengo yazo ingakhwezwa kakhulu.
Ukutshengisela ngale indlela kwabezitolo kungaphathisa ukuthi abezitolo nxa bekhweza intengo bakwazi ukuthi akumelanga benze ngolunya kodwa ngenhloso yokuthi baqhubekele phambili ngamabhizimusi abo hatshi ukuthi bafune ukunotha kanye.
Kuyadingeka njalo ukuthi uHulumende angenele ngokuphangisa phakathi kwabo bonke lobu ubukhohlakali osebusenziwa ngabezitolo kwehliswe intengo yempahla ngoba impilo yabantu isinzima. Ukuba yisisebenzi sokungathi kuyisono elizweni leZimbabwe ngoba izinto zimi manzonzo.
Okunye okudanisayo kakhulu yikuthi kukhanya sengathi abezitolo kabasafuni ukuthi abantu bangangezelelwa imali basale lokuncinyane okokubeka, bafuna ukuthi bathenge ngayo yonke basale izikhwama zitshaya ibhungayezi nanko phela imali engezelelwe izisebenzi zikaHulumende ihle yaphela zingena ezitolo.
Kungumbono waleliphephandaba ukuba uHulumende kuyadingeka ukuthi avikele iholo lezisebenzi kumaganyana abosomabhizimusi. Iholo lezisebenzi nxa lingasavikelwanga ukusebenza kwezisebenzi kungafana xathu lezithukuthuku zenja eziphelela eboyeni.
Kungaba kuhle njalo ukuthi labo abathengisa imali, abamankampani amakhulu kanye labosiphatheleni babotshwe ukuze kuphele bonke lobu ubumbulu osebukhona.
