uMthunywa
KULEZINSUKU ayipheli iviki singezwanga kumbe singabalanga kumaphephandaba ukuthi uzibanibanyana uzibulele.
Abantu basuke bazibuze ukuthi kambe umuntu ubesengenwe yini esenza into embi njengale. Abanye bazibulala ngoba besithi inhlupho abakhangelane lazo zizaphela, ukuzibulala asikho kulungisa inkinga okhangelane lazo.
Lengoma kaMfundisi uShongwe iyakutsho phela ukuthi ukuzibulala akusilo ikhambi lezinkinga.
Esintwini umuntu ozicitsha umphefumulo kuthiwa uyabe ehlungiwe, kulomoya oyabe sumngenile sibili, uyabe engasazenzi. Umuntu obhubhe ngale indlela kangeniswa ekhaya njalo kabuyiswa, lokhu kungenxa yokuthi esintwini kukholelwa ukuthi umuntu onjalo angaletha uzimu ekhaya.
Sokumangalisa kulezi insuku nanko phela lensane sezizibophela, kusuke kuthini umntwana ongakaqali lemfundo yebanga eliphezulu azibophele? Kukhona okukhona lapha, kukhona okutshaya amanzi okungasinhlanzi, kuyini pho?
Abadala bathi nxa umntwana ezibulala le yinto eyabe isesendweni lakibo, kusukela kubokhokho mhlawumbe uyabe ekhona owake wazibulala kudala.
Minengi imibuzo esizibuza yona, abantu bayaphela eNkwalini elokitshini leNtumbane ngokuziphosela khona bafe.
Abantu bayazibophela minyaka yonke e-park yeNketa 6, ungezwa kuthwa kulomuntu ozibopheleyo awudingi kutshelwa ukuthi uzibophele ngaphi uhle uqonde khonale osekuvame ukwenzeka into ezinje. Kubangelwa yini, abanye bathi bayabizana.
Ukuzibulala komuntu kungumlandu wethu sonke. Inengi labantu abazibulalayo umuntu wakhona kuyabe kulento emhluphayo. Zikhona izibonakaliso ezitshengisa ukuthi umuntu kulento emhluphayo, umuntu onjalo kumele ancediswe ngazo zonke indlela ahlale ekhangelwe.
Nxa umuntu kulento emhluphayo kadinge umuntu amthembayo angakhulumisana laye azamtshela njalo azwisise uhlupho lwakhe lokumncedisa. Sungenza i-counselling ilusizo kakhulu, lemasontweni kanye labazali bayanceda kakhulu. Abazali labo kumele babelenhliziyo ezinhle ebantwaneni babo ukuze umntwana nxa kulento ehluphayo angesabi ukuzokhuluma lawe. Omunye umzali uthola ehwabha egijimisa abantwana kuthiwa yikho bezangihlonipha kanti hatshi liphutha lelo, abantwana bacina sebethatha amanye amanyathelo angalunganga ngoba abantu okumele babelane labo inkinga abalazo bayizilwane.
Abomthetho labo bahlala bekhuthaza abantu mihla yonke ukuthi lo olokumhluphayo kakhulumisane lomunye kuboniswane okungenziwa. Ukuzibulala akulunganga bakithi, akulungisi lutho kodwa kwengezelela inkinga kwabaseleyo lapha emhlabeni.
