uMthunywa
MTHWAKAZI sesiphila emhlabeni wezimanga, osekusenzakala akusamangalisi, sesiphongumangala sedlule simelele okulandelayo. Ngoba sokuyinto yemihla yonke ukubona izigigaba ezingaginyisi mathe, lokhu phela kubangelwa yikuguquka komumo, nxa umumo uguquka labantu labo bayaguquka babe ngokunye.
Esesikubona lamuhla sokuze kungasamangalisi njengoba batsho abadala bathi umhlaba uyaphenduka, babekubonile, kodwa okwalezi nsuku esikubonayo sokuphambili njengesibhono Mthwakazi.
Lamhlanje kuliphupho layo yonke intombi ukuthi ithole ijaha elizayithanda liyigcine, ingasweli lutho, ikhombe ngophakathi, mhlawumbe kuze kufike ebangeni lokutshada. Asicala ukuba lezifiso ezinjalo, wonke umuntu uyafisa njalo kulilungelo lakhe ukuthi aphile impilo emjabulisayo. Kodwa-ke indaba isekutholeni lelo jaha, leso sithandwa sakho ozathi usibonisa abangane lezihlobo bababaze bangaqedi.
Ulithola ngaphi lelo jaha njalo njani? Hatshi siyakwazi sonke ukuthi intombi kumele iqonyiswe kodwa okwalezinsuku lentombi singaliqomisa ijaha kungabi ndaba zalutho. Nansi-ke indaba, kuyabe sokutheni nxa umuntu sequnga isibindi edinga ijaha ebulenjini, lokhu esesikwazi kuthiwa yi-Internet Dating? Uyabe sesweleni umuntu edlala ngengozi engaka esingamenza alahlekelwe langumphefumulo wakhe.
Zinengi ingozi esizizwa ngabantu abathole amajaha lezintombi ebulenjini. Ekadeni intombi ibiqoma ijaha elaziwayo imvelaphi yalo, ukuthi likhuliswe ngaphi kanye labantu abakhulise lelo jaha. Lejaha ngokunjalo lalingaphongudumela intombi liyiqomise nje lingazi ukuthi ingumuntu bani, kodwa lalidingisisa liqothule zonke imbokodo lithole konke elifuna ukuba kwazi ngentombi le eyabe sithinte inhliziyo yalo layithinta kwamancane andubana liyiqomise.
Pho okwalezi insuku ontanga bamatasa ngokuthola izithandwa ebulenjini, kuyingozi lokho, kuthi kunjalo ngumuntu oyabe ungamazi lokuthi wakhula njani, wakhuliswa ngabantu abanjani, uvela ngaphi, okumenze wazodinga umuntu ebulenjini kuyini?
Abantu sebegangile lapha emhlabeni, sebephenduke inyamazana, abanye ngabangena bengani bazodinga izintombi ikanti zimpisi ezilenhloso embi, nanko phela abanye batholwa becuyiwe ngabantu labo abayabe sebebathole lapho. Angithi kudala intombi ibisithi nxa amajaha engayikhulumisi kulenyathelo abadala ababelithatha kulungiswe lokho, akulunganga ukuzifaka engozini ngenxa yokwesaba ukuhlekwa ngabanye.
Bakhona abesifazane labo abalakho konke kodwa obaba yinkani ukuthi bazibike umuntu aze aye ebulenjini laye, kulezigebenga lamasela-ke lapho ezizafuna impahla yakho owayisebenzela nzima ziqede lapho zitshaye utshani umuntu asale ebambe isisila sejuba.
Loba sudubeke njani, sonke phela siyayifuna imali, imitshado kanye lezindlu lezimota ezicazimulayo lezi kodwa akutholwa njalo phela. Abanye ngobaba abalemizi abafuna ukudlala ngabantwana baqede babatshiye lemithwalo lemikhuhlane badle phansi, zithiywa ngezikudlayo phela, ebulenjini lapha umuntu uyabe efaka izithombe emi lovava lwemota kumbe endlini ebiza inkulungwane zamadola ontanga bahle beqe bengacabanganga.
Loba kuzaboniswana-ke ngobubi bokudinga umaqondana ebulenjini, abanye bazathi hatshi thina sikujwayele lokhu, uzibanibanyana utshadile lomuntu amthola lapho, njalo mina ngizananzelela ngeke ngiwele kulezo ngozi, bathi intonga enhle iganyulwa ezizweni, kodwa hatshi, ezinye intonga azilunganga. Iyalukhutha phela layo indwangu ugatsha, kumangalise ukuthi kutheni.
Kodwa labo abafisa ukukwenza lokho loba kuyingozi, qaphelani, akuhlanganwe endaweni ezilabantu, hatshi ematshokotshokweni, sasizwe phela ngabanye abaphuma emahoteleni sebebhunyumunyu sebesithi ijaha liphenduke laba yinyoka, asazi kuyabe sokutheni-ke lapho ngemva kwezivalo ezivaliweyo. Qaphelani, bayatsho phela abadala bathi okuncweba indlebe ngowakho!
