uMthunywa
IMPILO yalamuhla isiguqukile sibili abantu abaselayo inhlonipho abakade belayo izolo. Behluleka khona ukuhlonipha abantu asebedlula emhlabeni nanko phela mihla lemihla sizwa izindaba zabantu abaphanda amangcwaba kuthi abanye kube ngabatshontsha amabhokisi abafileyo khonale emangcwabeni.
Ngeviki edluleyo iphephandaba leli beliqukethe udaba lwabantu abagebha inhlabathi emangcwabeni eNumber 6 khonapha koBulawayo befuna ukwakha izindlu zabo zokuhlala.
Endulo amangcwaba abehlonitshwa kakhulu obekubangela ukuba kungabi lomntwana kumbe umuntu osondela eduze kwawo. Ingcwaba belisesatshwa njalo lowo obebonakala emangcwabeni egebha inhlabathi bekuthiwa ungumthakathi ngoba ingcwaba lihlonipheka.
Empilweni yalamuhla uthola umntwana omncane equma emangcwabeni ngitsho lebusuku engesabi lutho.
Ukugejwa kwamangcwaba la kutshengisa ukuba abantu sebexhwale okwedlulisileyo njalo kabasela nembeza ngoba bengahloniphi abantu asebatshonayo.
Amangcwaba kumele ahlonitshwe njalo esatshwe ngoba lombhalo ongcwele uyatsho ukuba umuntu ofileyo ulemimoya emibi emlandelayo ngakho umuntu ophilayo akumelanga ahlanganele lesidumbu sofileyo.
Nxa abantu laba bezisondeza duze lamangcwaba la bahotsha imimoya ethile engabalethela iziqalekiso empilweni zabo.
Kwesinye isikhathi abantu kabaphumeleli ezintweni abazenzayo ngoba belandelwa yimimoya yabantu laba abafileyo.
Laba abatshontsha inhlabathi le beyisebenzisa ekwakheni izindlu zabo bazidonsela imikhokha ezindlini lezo njalo bazahlala besehlelwa zingozi ezitshiyeneyo ngoba imimoya yabantu abafayo ibalandela.
Ngaphandle kwemimoya le abantu laba baphanda amangcwaba betshiye amabhokisi ekhanya egcekeni. Amasela avame ukukutulela izidumbu lezo phansi bengagqize qhakala ukuba kuyazila ukutshiya isidumbu sisegcekeni.
Kungumbono woMthunywa ukuba amapholisa asebenzelane lezakhamizi ezihlala eduze lamangcwaba la ukuze kubotshwe izigelekeqe lezi ukuze amathuna ahlonipheke njengendulo.
Izigilamkhuba lezi zingagebha amangcwaba ziwatshiya ekhamisile okubangela ukugugudeka komhlabathi ngoba indawo yonke iyabe isingamagodigodi okungacina kubangela ukuba izulu nxa selisina amanzi la angene phakathi.
Abantu kumele bazinuke amakhwapha, kungangcono bayedinga inhlabathi yokwakha kwezinye izindawo hatshi emangcwabeni ngoba inhlabathi le ingabe ileziqalekiso.
