uMthunywa
ILIZWE leZimbabwe liqhubekela phambili lithuthuka kwezemfundo kungenani lenhlupho elibhekane lazo kwezomnotho welizwe.
UHulumende wakuleli wenza konke okusemandleni akhe ukuthi ilizwe lethu lihlale liphezulu kwamanye amazwe onke eAfrica ngokuba lenani eliphezulu labantu abakwazi ukubala lokubhala.
Indlela lezi zigoqela ukuba lababalisi abafundele umsebenzi ezikolo zonke nje kuleli, zingaba ngezemfundo yaphansi kumbe eyaphezulu.
Ngalokhu sitshayela izandla ugatsha olubona ngezemfundo yaphansi kanye leyaphezulu ngokuzama njalo ukuthuthukisa ezemfundo kuleli ngokunika izikolo ezenze kuhle imvuzo.
Kuviki ephelileyo uPermanent Secretary wogatsha lwezemfundo uDokotela Sylvia Utete unike izikolo ezinhlanu zakoBulawayo izicoco zeBells Award okungumvuzo wokuba lempumela zemihloliso yanyakenye emihle. Izikolo zakoBulawayo ezithole imivuzo le zigoqela ezimbili ezemfundo yaphansi iSt Patrick’s Primary kanye leKhumalo Primary School.
Kuthi kumfundo yaphezulu izikolo ezithole umvuzo lo yi-Founders High School, Pumula High School kanye leHigher Learning Centre.
Izikolo lezi zithole njalo imivuzo yemali engange $5 000 isikolo sinye ngasinye.
Inyathelo logatsha lwezemfundo lolu luyancomeka kakhulu ngoba ukuze izikolo lezi ziqhubekele phambili zisenza kuhle kumele zibone ukuba umsebenzi eziwenzayo uyabukwa.
Yikho nje sisithi impumela yemihloliso kumele ibongwe.
Sitshayela njalo ihlombe isithembiso sogatsha lolu ukuba ngomnyaka ozayo imivuzo le izasabalaliswa indawana zonke zelizwe ukuze zonke izikolo zibe lengqobe yokuthi ziphumelele kumihloliso ukuze zithole isicoco lesi esiligugu kwezemfundo lanxa nje kudala sasiphiwa kuphela izikolo ezigcina kuhle insimbi yesikolo.
Sitshayela ihlombe njalo uMphathintambo wogatsha lolu uDokotela Lazarus Dokora ngokuzipha umthwalo wokuthi kuqhatshwe ababalisi abafundele umsebenzi ukuze abakhokheli belizwe bakusasa babe bethole ulwazi olufaneleyo.
Ukuba lababalisi abafundele umsebenzi kuyaphakamisa njalo ezemfundo.
Kusenjalo kungumbono waleliphephandaba ukuthi uHulumende useselomthwalo wokukhombisa ababalisi ukuthi bayefundisa ngitsho lezikolo ezisemaphandleni ngoba le yiyo kuphela indlela ezenza intuthuko ibekhona kuzo zonke indawo elizweni ngoba phela intuthuko kayisi yemadolobheni kuphela kodwa kumele isabalaliswe ilizwe lonke.
UHulumende angahuga ababalisi laba ngokufaka amagetsi ezikolo lezi kanye lokubona ukuthi kulemigwaqo ukuze kubelula ukufinyelela kulezondawo.
Kuyajabulisa njalo ukuthi uHulumende uqhubekela phambili ngohlelo lokudonsa amagetsi emaphandleni kugoqela ezikolo, ezibhedlela lemakilinika.
Lokhu kulinyathelo elikhulu kuhlelo lokuthuthukiswa kwezigaba.
