uMthunywa
AMAQHAWE ngabantu ababaluleke kakhulu emazweni aseAfrica ake aphila ngaphansi kombuso wabelungu ababelochuku olumangalisayo.
Amanye amaqhawe alahlekelwa zimpilo zabo egangeni, abanye lamhlanje bayizilima ngenxa yamanxeba abawathola ngesikhathi sempi kazibuse.
NgoLwesihlanu ngeviki ephelileyo ilizwe leZimbabwe lilahlekelwe ngelinye lamaqhawe ahlonitshwayo kakhulu kumbali yakuleli kanye lakusizwekazi seAfrica ngenxa yejogwe alithwalayo lokukhulula ilizwe lakithi kumbuso wabelungu.
UKhomuredi Robert Gabriel Mugabe owake waba nguMongameli welizwe leZimbabwe njalo ongubaba owadabula ilizwe leli ukhothame ngemva kokugula isikhathi eside elizweni leSingapore lapho abeselatshwa khona.
Sokuzwakele umkhosi wokwedlula kukaKhmrd Mugabe, uMongameli uMnangagwa uthume iqula elikhokhelwa nguMsekeli kaMongameli welizwe ukuba liyothatha isidumbu somntwana wenhlabathi ukuze sizobekwa emhlabathini wabokhokho baso.
Umphakathi ovela ezabelweni ezehlukeneyo uzathola ithuba lokuhlonipha iqhawe leli okokucina ngoLwesihlanu enkundleni yeRufaro kuthi ngoMgqibelo sizasiwa eNational Sports Stadium lapho okuzakuba lenkonzo yelizwe yomufi njalo abantu beZimbabwe kanye lezinye izikhulu zamazwe angaphandle abazathola ithuba lokumhlonipha okokucina.
Ngesikhathi isizwe seZimbabwe siphakathi kokudabuka lokukhala ngokulahlekelwa okukhulu, njengephephandaba likazulu lamuhla sikhumbula imbali yeqhawe likazibuse ubaba uKhomuredi Robert Mugabe njalo ongomunye wabakhokheli bakusizwekazi seAfrica owanikela impilo yakhe ukukhulula abansundu kubukhokheli babelungu waphinda wabathuthukisa ngendlela ezehlukeneyo.
Kuqakathekile ukuthi abantu bazi ukuthi wayeqakatheke kangakanani. Nxa kubaliswa amaqhawe aqakatheke kakhulu kumbali yesizwe uMugabe ubalwa ndawonye loMdala wethu, ubaba uJoshua Nkomo labanye abanengi.
UKhmrd Mugabe uzahlala ekhunjulwa ngokusungula inhlelo ezifana leFree Education for All lapho wonke umuntu okwakukhangelelwe ukuthi aye esikolo kungelambadalo okuyikho okwenza isizwe sakithi saziwe ngokuba labantu abafundileyo abanengi kusizwekazi seAfrica nanko phela umbiko weZimbabwe National Statistics Agency (ZimStat) owakhitshwa ngoMbimbitho nyakenye uveza ukuthi kulesilinganiso se-94 phesenti ekhulwini.
Kumele abantu bazibuze ukuthi okwenza wabeka umthetho lo luthando lokuba abantu abakhokhelayo baphakanyiswe ukuze bathuthuke yikho nje waze wakha izikolo endaweni ezehlukeneyo ukuze zifinyeleleke lula.
Olunye njalo uhlelo alusungulayo ngolokutholisa umphakathi usizo lwezempilakahle kuye wonke umuntu. Ngaphansi kwaloluhlelo kwakhiwa izibhedlela kanye lamakilinika endaweni ezehlukeneyo ukuze abantu bafinyelele ezempilakahle.
UMugabe wayehlala ekhalaza ngokuthi abansundu badudulwa emhlabathini yabo baphoselwa emaguswini, wayehlala ekhala ngokuthi abantu batholiswe umhlabathi wabo yikho nje waqhuba uhlelo lokuhlaliswa kutsha kwabansundu emhlabathini ovundileyo.
Kumele ngoLwesihlanu langoMgqibelo simnike inhlonipho yokucina sizibuze ukuba ngabe silentokozo lenkululeko, ngabe sifundile na aluba obaba oJoshua Mqabuko Nkomo laboKhomuredi Robert Mugabe abazinikelanga ngendlela abazinikela ngayo.
Kumele njalo uHulumende aqhubekisele phambili inhloso yabalweli abahamba phambili ukuze umkhonomi welizwe leZimbabwe uthuthuke.
