uMthunywa
IBHAYIBHILI elingcwele lithi lapho okuhlangana khona ababili kumbe abathathu ngegama lami, ngizakuba phakathi kwabo. Liphinde njalo lithi ukuthembeka kubalulekile loba kunzima. Kuyadanisa-ke ukuthi loba ikhabhinethi kuviki ephelileyo inike amabandla ezokholo imvumo yokuthi amakholwa ahlangane akhonze, bakhona abenza lokhu ngaphandle komthetho obekiweyo.
Kumbiko weKhabhinethi owakhitshwa ngoLwesibili kuviki ephelileyo, uHulumende waveza ukuthi abakhokheli bamabandla kumele bavumele kuphela amalunga awo ahlatshwe amajekiseni womabili okuvikela iCovid-19 kunkozo ukuze kuvikelwe ukumemetheka kwegcikwane le-coronavirus.
Loba umthetho lo ubekwe wacaca kuye wonke umuntu, kuyadanisa ukuthi kulelinye ibandla lapho okutholakale kulamalunga ebandla angahlatshwanga ijekiseni le enkonzweni. Abafundisi kukhangelelwe ukuthi kube yibo abalandela umthetho njalo abafundisa amalunga abo ukuthembeka pho nxa bona sokuyibo abenza ukungathembeki kubizwa kuthiweni lokhu?
Kuhle ukuba njengoba uHulumende evumele ukuthi amabandla ezokholo avulwe ngoba esazi ukuba amakholwa manengi elizweni lawo kumele ahloniphe imithetho ebekiweyo.
Khathesi njengoba sikusimo lesi, kubalulekile ukuthi abafundisi kunye labanye abakhokheli bamabandla babone ukuthi bayakhuthaza amalunga abo ukuthi bahlatshwe ngoba yiyo kuphela indlela engenza bavunyelwe ukuthi bahlangane emabandleni abo.
Lesi yisikhathi sokuba kubonakale ukuthi abafundisi lokho abakufundisa amalunga abo ukuthi ukuthembeka kuqakathekile bayakwenza bona na. Kayisiso isikhathi sokuthi abafundisi batshumayele intshumayelo abangaziphiliyo. Yisikhathi sokuba kubonakale abafundisi abathembekileyo lesi, njalo lokhu bangakwenza ngokwalisa abazalwane abangahlatshwanga ukuhlanganyela lamanye amalunga ebandla ngoba lokhu kuyabe kusenzelwa bona ukuthi baphephe kubhubhane lolu.
Iphephandaba likazulu linanzelela ngokudana ukuthi abafundisi abanengi khathesi bayawuqamula umthetho weBhayibhili. Inengi labafundisi likhanya selikholwa ukuthi umuntu kufanele enze njengokutshelwa kwakhe hatshi ukuthi umfundisi wenza njani.
Nxa ungumfundisi kufanele ube yisibonelo esihle ebandleni ukuze amalunga ebandla lawo akwazi ukuthembeka okudingakalayo ngesikhathi lesi.
Umbiko othi amapholisa abophe umfundisi webandla leChrist Embassy eGlenview eHarare obosenkonzweni lamalunga ebandla angu-50 angahlatshwanga ijekiseni yeCovid-19 iyadanisa kakhulu njalo kulakho ukwenza uHulumende acine evala futhi amabandla ngoba abakhokheli bephambuka kumithetho ebekiweyo.
Isonto yindawo lapho amakholwa afundiswa khona ngokuqakatheka kokuthembeka njalo akukhangelelwanga ukuthi abafundisi kube yibo abangathembekanga.
Umfundisi kufanele athembeke ngaso sonke isikhathi. Lokhu kutsho ukuthi lakuzehlakalo ezibonakala angathi zincane ukuthembeka kuyadingeka.
Kambe amalunga ebandla azathembeka njani wona ebona ukuthi abakhokheli babo bephula imthetho.
Kungumbono kaMthunywa ukuthi amabandla kufanele alandele umthetho obekwe nguHulumende wokungamukeli amalunga ebandla angahlatshwanga ngoba le yiyo indlela ekhona yokulwisa ukumemetheka kobhubhane lolu oselubulele izinkulungwane zabantu.
