uMthunywa
IZOLO mhlaka 22 kuMpalakazi ilizwe leZimbabwe belithakazelela iminyaka engu-34 yokubambana komphakathi, kukhefu elaziwa ngokuthi yi-Unity Day.
Ngalesi isikhathi ngo-1987, uJoshua Nkomo emele ibandla leZAPU loRobert Mugabe emele iZANU, bakhetha ukukhumisana umlotha, kwaphela impi eyayikhona elizweni.
Lokhu kwaba yisiqalo senguquko eZimbabwe.
Ngemva kwayo yonke iminyaka le, kuyacaca ukuthi ukubambana kuzala ingqubekela phambili.
Ukubambana ngamandla kwezizalwane zakuleli yikho osekulethe ingqubekela phambili esihlahle indlela yokusungulwa kohlelo lwe-Devolution olusekelwa nguMongameli welizwe uEmmerson Mnangagwa.
Enkulumeni yakhe yalonyaka yokunanza isivumelwano lesi, uMongameli welizwe uMnangagwa uthe umanyano lolu kumele lugxile kwezentuthuko.
Kumbiko wakhe uthe ukuba khona kwe-Unity Accord kumele kwedlulele ngale kokuxazulula ingxabano, ibeyiyo eyakha isizwe lokuthuthukisa umphakathi.
Lokhu kuqinisekiswa yimisebenzi kazulu esibonakale iqhutshwa nguHulumende kusukela ngomnyaka ka-2018 kuzabelo zonke zelizwe. Uhlelo lwe-Devolution lolu lungaphansi kwezithembiso ezenziwa nguMongameli ngesikhathi evuma ukuphatha intambo kulandela ukuvotelwa kwakhe esihlalweni.
Phezulu kwalokhu, imisebenzi kazulu engaphansi kohlelo lolu, isekelwa yiNational Development Strategy (NDS-2), okuluhlelo oluhlose ukuphakamisa umkhonomi kusiyafika umnyaka ka-2025.
Ukuze kufezwe okuhloswe yi-devolution, ukubambana kumqoka. Ukubambana lokhu kubalisela ukusebenzelana ndawonye loHulumende, umphakathi lamankampani.
Ngesikhathi ilizwe lithakazelela ilanga lokubambana, kuhle ukuthi kubekwe phambili uhlelo lwe-devolution. Isizatho salokhu yikuthi lolu luhlelo olusebantwini njalo lumqoka ekubambaniseni umphakathi.
Umphakathi lo ugoqela lamabhizimusi.
Kulomzekeliso omuhle kulokhu. Ngaphansi kwe-devolution, amakhansili eziqinti ezisemaphandleni asebambane lamankampani azimele wodwa ukuqhuba inhlelo zikaHulumende zokuthuthukisa izigaba.
Imigwaqo iyavuselelwa, kwakhiwa amakilinika, izibhedlela lezikolo.
Izazi kwezamabhizimusi, lokuphila kwabantu ziyavuma ukuthi ukubambana kwesizwe kuletha ingqubekela phambili.
Nxa sikhuluma ngemisebenzi lenhlelo zokuvuselela umnotho ezifana le-Devolution, singakhohlwa ukuchaza ukuthi konke lokhu kulethwe yikubambana kwabantu.
Kunengi esingakutsho okulethwe yikubambana kwesizwe kodwa okubuya phambili yikuthula, ukuthuthuka lokuhlaliseka kwabantu bakithi.
Ilizwe leli ngelabantwana beZimbabwe. Yikho okukhankaselwa nguMongameli uMnangagwa nxa ehlala esithi ilizwe lakhiwa ngabanikazi balo.
Ukubambana okwalethwa yi-Unity Accord kumele njalo kube yisifundo ebantwaneni abasakhulayo. Lokhu sikutsho ngoba inengi alazi lutho ngokuqakatheka kwaleli ilanga. Kumele bafundiswe ukuthi ilanga le-Unity Day litshoni.
Asilandeleni inhlelo zikaHulumende, sisekele i-Devolution ngoba iyinsika yokuthi indawo ngendawo zivuselele umkhonomi, kwakhiwe kube lemisebenzi.
Ukubambana kumele kuhlale kukhona ngoba kuletha ukuthula lentuthuko. Ngabe siyalwa, aluba intuthuko le ekhona kayikho yingakho uMongameli ehlala egcizelela kumbuthano eminengi ukuthi ukubambana kudala ingqubekela phambili.
