uMthunywa
UMTSHADO bekuyinto ebibukeka inhle kakhulu emphakathini. Kanti lalowo otshadileyo ubehlonipheka kakhulu ngoba esefeze iphupho lakhe leminyaka.
Pho sekutheni zulu kaNdaba lamhlanje? Kulezi insuku abantu sebetshaya umazivelela. Sebengomavuka bekhona kanti ekadeni bekukhulunyiswana labobabakazi kube yibo abacandela abatsha indlela bebone lokuthi sivuthiwe sefanele ukuyihamba.
Kulezinsuku, uzulu kunye leziphathamandla zikaHulumende zithinta indaba ezikileyo kakhulu eyokwendiswa kwabontanga.
Kulabo abalaleleyo lihlaba lephukele. Kuyadanisa ukubona intsha ilahleka izithola sisemitshadweni engeke yabaphathisa kusasa.
Khona kuvele kujahweni mantombazana? Umuntu kumele afunde ukubekezela kuze kufike elakhe ithuba elifaneleyo.
Kulezi insuku abantu abatsha indlela abahahabela ngayo icansi ithelela usizi. Yikho okunye okudala ukuthi bazendise besesebancane ngoba basuke bazithwale.
Kuba buhlungu kakhulu nxa umuntu esezithwele isisu somuntu othetheyo ongeke wamthatha uzwe sekuthiwa isisu asilayise.
Kungumlandu wabazali emakhaya ukuthi bavikele intsha ekugxumukeleni emitshadweni bebancane. Kusuka kube liphutha elikhulu nxa umzali ngenxa yokuthanda ezifela emlonyeni sevumela umntwana ukuthi ayekwenda ngoba emithiswe yisikhulu.
Kwezinye izikhathi uzwa abadala bethi sesikhulumelene. Kwenziwa njani ukukhulumelana lomuntu ophambanise umntwana wamkhupha esikolo wabuya njalo wamphazamisela ikusasa lakhe.
Isizwe kumele sidonse kanye kanye. Izephulamthetho ezimithisa abantwana abancane zibotshiswe njengalokho umthetho ungakuvumeli ukuthi abasakhulayo bebulawelwe ikusasa labo ngamaxhegu.
Singeke sakutshaya indiva ukuthi zikhona izalukazi esezizifunela ontanga. Uzwe sekuthiwa ngu ‘Ben 10’. Lazo kumele zibotshiswe ngoba zitshabalalisa ikusasa labasakhulayo.
Kwenza ontanga bephambane bengasakwazi ukukhangela phambili bebe lekusasa elihle. Ezikhathini ezinengi babathelela lemikhuhlane eminengi eyemacansini.
Sizwe sikaMthwakazi asivuseni inkophe siziphe umlandu wokwakha isizwe sethu. Impucuko yesizwe sethu yeyame ezandleni zalaba abasakhulayo kuyikho nje kumele sibavikele kukho konke okubehlelayo.
UHulumende laye kudingakala ukuthi aqinise umthetho. Wonke umuntu otholakala esemathandweni lomntwana omncane kabotshwe kungakhathalekile ukuthi uvumile ngoba kulezigilamkhuba ezilenhliziyo embi yokumemethekisa igcikwane ngokuhamba zihlangana emacansini labontanga.
Kuba buhlungu kakhulu ngoba laba abantu bazingenela beyibo nje bengavikelanga ngejazi lomkhwenyana.
Vuka sizwe seZimbabwe ulwisane lobubi esibhekane labo obusibulalela impucuko yesizwe sakithi.
Singaba yini nxa singaswela intsha efundileyo? Sizahlala sikhala ngezinkinga zokuswela inkokheli ngoba sekele izixhwali zachitha ikusasa lesizwe sakithi.
