uMthunywa
NgoMvulo ngeviki ezayo izizalwane zonke ezelizweni leZimbabwe ziyabe zinanza ilanga lamaqhawe. Ayiwo alwela inkululeko yonaleyo esesilayo lamuhla egoqela ukunikeza abantu abansundu umhlabathi kanye lokutholiswa amandla enotho kubo bonke abantu.
Kuyinto enhle kakhulu ukuthi sikhumbule amaqhawe, ngoba kungayisiwo amaqhawe ngabe ilizwe liloku lisezandleni zamaKhiwa wona ayelihluthunele okhokho bethu besebenzisa inkafulakufa, okhokho ababengakayizwisisi ukuthi kanti isebenza njani.
Emva kwalokhu amaKhiwa adlisa abaNsundu imbuya ngoluthi kwabancane indawo oNsundu ehaladwa waze wangena iganga laye wayaphenduka esethwele inkafulakufa kwabancane indawo kumntanomlungu waze wathi mayuyu akukhulunywe.
Kwaphela lokhu abantu abamnyama labo bezwa ubunandi bukazibuse yikho nje bekholisa uma kulekhefu lamaqhawe. Umbuzo esizibuza wona yikuthi kanti amaqhawe ngobani? Ukuze kuthiwe umuntu liqhawe uyaba eyenzeni ngaphi, nini njalo njani?
Amaqhawe lawa afana laboJoshua Mqabuko Nyongolo Nkomo, Simon Muzenda, Joseph Msika, Jason Ziyaphapha Moyo, Josiah Tongogara labanye abanengi esithi singababalisa lingaze liyetshona kunina, kulamaqhawekazi njalo indlovukazi uJohanna Mafuyane. Laba badela impilo zabo, bafulathela izimuli zabo badobha amaAK 47 balubhekisa endle bejonge ukuyangqikilana lesitha esasisidla ubhedu ngoba singafuni lenkululeko yabantu abansundu.
Ngokuzimisela kwabo babuya beyiphethe ngezandla zombili iZimbabwe yethu, iloba nje inengi labo lafela khona egangeni ngoba lifuna ukuthi izizukulwane ezizayo zihlale kuhle elizweni kungalakuhlukunyezwa.
Yikho Mthwakazi kuhle ukuthi sikubambeni ngezandla zombili lokhu esakutshiyelwa ngamaqhawe kanye lamaqhawekazi ethu. Phela nxa singasayenzanga njalo, izitha zizabuya njalo zizembese ngesikhumba semvu zijonge ukuzasithathela inotho yethu, yona eyabuya ngokuchitheka kwegazi.
Yikho lamuhla sesawuthola umhlabathi wethu ngoba yiwo oligugu eliqukethe inotho yelizwe. Yikho nje loMvelingqangi kusigaba sokulima sika2020/2021 esinike izulu abantu bayitshaya inala kwacaca ukuthi ngempela inotho isemhlabathini.
Ikhona njalo eyinye inotho eyafihlwa phakathi kwawo njalo umhlabathi eyamatshe aligugu agoqela idayimani, iplatinum kanye legolide.
Asimelaneni labo bonke abantu abahlanyelwe yisitha phakathi kwethu njengoJudasi waseBhayibhelini, ngoba bengabathengisi abafuna ukuthengisa ilizwe lethu ngemali abayigqitshwa ngamazwe aseNtshonalanga. Bayakhohlwa ukuthi lelilizwe labuya ngegazi lamaqhawe alele eHeroes lamuhla.
Ngesikhathi sinanza lelikhefu lamaqhawe sikhumbula njalo lamanye amaqhawe angazange ayiphathe inkafulakufa kodwa ayesiza labo ababeyiphethe ngendlela ezehlukeneyo, kungabe kungokubanika ukudla, ukubanika imbiko ebalulekileyo ukuba izitha zitshone ngaphi lokunye okwehlukeneyo.
Asiwabongeni njalo siwakhumbuleni amaqhawe ethu ngoba sikhululekile lamuhla lokhu kungenxa yawo.
