uMthunywa
OKUMQOKA emphakathini yikuhlaliseka lempilakahle yabesifazane.
Loba yiliphi ilizwe, akulanto eqakatheke njengokugcina omama labantwana abangamankazana. Ikusasa yoluntu igxile kumpilakahle yabomama.
Kuleli iviki iphephandaba likazulu lithanda ukwazisa uzulu ukuba ngaphandle kokuthi sigcine kuhle abesifazane, angeke sithi sakha ilizwe. Ilizwe ngelizwe umhlaba wonke libizwa ngabesifazane.
Sikutsho lokhu ngesikhathi izizalwane zakuleli zitshayela ihlombe isibhedlela seMpilo koBulawayo kulandela ukwenelisa kwaso ukwehlisa isilinganiso sabomama abedlula emhlabeni ngesikhathi bebeletha.
Abezempilakahle, labesayensi bakuveza bengafihli ukuba impilakahle yelizwe ibonakala ngokuhlaziya ukufa kwabomama abakubanga lokubeletha.
Isibhedlela seMpilo sibike ukuba sehlisa ukufa kwabomama ababelethayo ngesilinganiso samatshumi ayisikhombisa ekhulwini, i70 percent.
Sithi halala kumadokotela labongikazi balesi isibhedlela ngomsebenzi omuhle.
Ngesikhathi inengi liphethe emlonyeni ligcona isibhedlela lesi, nanko okuhle esingakutsho.
Isibhedlela seMpilo silembali embi. Abanye bathi nxa ungazibona ungena kuso ugula, awuphumi.
Abanye bathi nxa ulesihlobo sakho esilaliswe khona utshelwa ngalokhu lalokhuya okumele kuhlolwe kodwa uphinde utshelwe njalo ukuthi imitshina yesibhedlela ifile kungakho-ke kumele uyebhadala izigidi zamadola kwezinye indawo ukuze kwenziwe.
Lalapho nxa owesifazane ekhangelele ukukhululeka, uvele esabe ukuya eMpilo ngoba uzatshelwa indaba ezingapheliyo.
Kukho konke esikuzwayo, lesikubonayo nxa siseMpilo, siyathaba ukuthi kukhona okuhle.
Abesifazane abahlale bekhululukile ukuthi nxa besiyabeletha eMpilo, impilo zabo zisezandleni eziphephileyo.
Abanye bethu abadinwa ngokuchothoza omongikazi labodokotela beMpilo. Nxa ubezwa bekhuluma ngalesi isibhedlela, uzizwa uqubuka. Lalapho ogula khona utshela labakugcinileyo ukuthi bengalingi bakuse eMpilo.
uSolwayo Ngwenya
Kodwa nanzi indaba ezinhle ngokugcinwa kuhle kwabomama ababelethayo. Omongikazi, abancedisi babo labodokotela bakulesi isibhedlela kumele baphakanyiswe.
UMthunywa uthi mhla uhlangana labongikazi beMpilo, lawe ubabonge. Ikusasa lethu lisezandleni zabo.
Aluba uHulumende uyabanikeza amasheleni phezulu, njengesibongo kulokhu abakwenzayo ngokwehlisa ukufa kwabomama abazithweleyo.
Ngeminyaka edluleyo, kubikwa bekusifa omama ebedlula i-60, kodwa ngo2021, abangu-18 bedlule emhlabeni.
Isibhedlela seMpilo sizimisele ekuthini siphakamise indlela esiphatha ngayo abesifazane, ngokubika kukaSolwayo Ngwenya, umaqhuzu walesi isibhedlela.
UNgwenya ngoMvulo wazise intatheli ukuba bahlezi bekhuthaza abesifazane ukuthi baphangise ukubhalisa lokuhlolwa nxa bezithwele. Uthe inhloso yabo yikuphathisa bonke abesifazane ababelethela esibhedlela seMpilo. Amazwi la ayinduduzo aphinde abe yinkuthazo futhi.
Njengabahlali bakoBulawayo asizameni ukuthi lathi sincedise isibhedlela lesi. Endaweni yokusola, asakheni okungokwethu. Yebo siyazi ukuthi akulamaphilisi leminye imithi, kodwa nxa kuthe kwaba lobuhle obuphuma eMpilo, asibongeni.
Ithemba esilalo yikuthi izisebenzi zakulesi isibhedlela zingadinwa. Asifuni ukuzwa sekuthiwa ziyehluleka.
Impilakahle yabomama isezandleni zethu sonke.
