uMthunywa
BEKUNGABIZWA ozwayo ngoMvulo wakuyonale iviki ilizwe leZimbabwe lisenza imbali nanko phela ngokwakuqala lokhu ilizwe lathatha uZibuse umkhosi lo ubugujwa koBulawayo.
Abantu bebethe gwaqa enkundleni yeBarbourfields Stadium bevela endaweni ezahlukeneyo kuthakazelelwa ukwanelisa kweZimbabwe iminyaka engamatshumi amane lambili lathola uZibuse.
Umkhosi lo wandulelwe yikulunyathiswa kwesibane selanga likaZibuse ngeSonto andubana sibhodiswe emalokitshini ehlukeneyo kunye lenkezo kaZibuse ebilwela ngamaqembu amakhulu akuleli eleHighlanders kunye leDynamos.
Usuku lolu lusuku oluqakatheke kakhulu kuzizalwane zakuleli ngoba zihlonipha njalo zibonga ukuzinikela kwabantwana benhlabathi ukuthi balwise umbuso wabelungu ilizwe lithole uZibuse.
Umkhosi walonyaka ubuqakatheke kakhulu ngoba kusukela ilizwe lathatha uZibuse umkhosi lo ubusenzelwa esigodlweni seHarare kodwa ukulethwa kwawo koBulawayo kube yisitshengiselo sokuba uMongameli wethu
uMnangagwa uzimisele ukuba izizalwane zonke zakuleli zazi ukuba usuku lolu ngolomuntu wonke kungakhathalekile ukuba ungumhlobo bani, uvela kuyiphi indawo, ungumbala wuphi, ungowaliphi ibandla loba ungowobulili buphi. UZibuse ngowethu sonke njalo kumele sihlale simgagadlele singaze samthengisela abahuquluzi.
UZibuse lo wanikeza abansundu amandla apheleleyo phezu kwezwe labokhokho lona elalithunjwe ngabezizwe nanko phela ayisekho imigoqo ebikhona izolo. Azisekho indawo lapho okuthiwa abathile akumelanga bahambe kuzo loba ezihlala abathile bodwa.
Imithetho ehlukuluza abansundu layo ungayibona. Isililihlo lentwala njengoba bona abansundu sekuyibo abaphathintambo abenza leyo mithetho. Imithetho ekhona lamhlanje igcizelela njalo ivikela injongo kaZibuse ibuye iqhelise ukukhululeka komphakathi.
UMongameli welizwe uthethe njalo ithuba kumkhosi walonyaka ukuthi achaze ukuba izabelo zonke zakuleli zizakuba lethuba lokuthi ziphathe umkhosi lo. Lokhu kukhangelelwe ukuthi kusize ukuthi ubukhokheli buke bugxile kuleso sabelo kubonakale okumele kwenziwe okuzaphathisa kuGDP yaleyondawo kanye leyelizweni lonke jikelele.
UHulumende weZimbabwe usenikeze njalo amandla omnotho apheleleyo kusapho lweZimbabwe.
Kuqakathekile ukuthi usapho lweZimbabwe lungafani lenkukhu ezidla zisesulela phansi kodwa ziyihloniphe injongo kaZibuse kanye lalabo abazinikela ukuze bakhulule ilizwe ezandleni zabamhlophe.
Phezu kwazo zonke izinto ezinhle ngoZibuse lo, iZimbabwe ithakazelela njalo ukuhluthuna umhlabathi. Ngemva kokuthola uZibuse umhlabathi wabiwa kutsha. Inengi labansundu laphiwa amapulazi nguHulumende ngakho selisenelisa ukuzilimela ukuze liziphilise.
Kungumbono woMthunywa ukuthi nga izizalwane zonke zeZimbabwe ziyasebenzelana ukuze kulondolozwe, kupheleliswe njalo injongo kaZibuse. Inhlelo zonke esizihlelelwa nguHulumende asingeneni kuzo mahlabezulu ngoba ngezethu, zijonge ukuthuthukisa mina lawe. Phezu kwakho konke zijonge ukuthuthukisa ilizwe lethi leZimbabwe.
Sithi amhlophe Zimbabwe ngokwanelisa iminyaka engu-42. Mpilo ende kuwe!
