uMthunywa
KUYINTO elusizi kakhulu ukuthi ngemva kokusebenza gadalala abadala basala izikhwama zivuza bengela ngitsho lepeni elesikhala sebekhwathaze yonke imali behambisa abantwana abangelandaba lemfundo esikolo.
Akusinto elula ukuvukela emsebenzini ongakuniki imali eyeneleyo uthi ngemva kwalokhu ngenxa yokufisela abantwabakho impilo engcono kwelakusasa ukhiphe yonke imali ubathengela impahla yesikolo kunye lokubabhadalela indleko zakhona.
Kunzima kakhulu ukuhlanganisa izimali zesikolo njalo wonke umzali usuka azimisele ukuthi kungaba ngcono kulanjwe endlini kodwa abantwana bethole ukuba ngabantu empilweni ngoba alikho elinye ilifa ongalitshiyela abantwabakho eledlula imfundo.
Kuyonale iviki izikolo bezivulwa, njalo amasango ezikolo ahle athi evulwa abantwana abangabhadalanga baxotshwa.
Abazali bakhwathaze izikhwama bahlanganisa ukuze abantwababo bayefunda. Okusuka kube buhlungu-ke endabeni ezinje yikuthi lanxa abazali besebenza nzima ukuze abantwababo baphumelele ezifundweni zabo kulabanye abantwana abangakuboniyo konke lokhu, ababona kungcono ukuthi bazidlalele esikolo kumbe baphitsheke ngokuphatheka kuzidakamizwa ngoba abanye abadlala labo bayakwenza.
Abacabangi ukuthi abazali baswela ubuthongo ngenxa yokuthi badliwa yikuthi imali bazayithatha ngaphi kumbe bazabhadala njani imali abayabe bezithethe ukuze bahlawule imali yesikolo.
Kuhle-ke ukuthi abantwana bengadlali ngesikolo ngoba abazali benzela bona ukuthi babelempilo engcono. Umntwana odlala ngesikolo ecabanga ukuthi ukhawulisa omunye umuntu uyisiwula okumele abantu basizwele usizi ngoba umuntu uyazifundela kafundeli omunye umuntu.
Phela okuhle ngemfundo yikuthi uzifundela wena wedwa njalo nxa usufundile ngokwakho akula muntu ongakubangisa imfundo yakho.
Yebo kambe kulabanye abangacabanga ukuthi eZimbabwe yethu akusasizi ukufunda ngoba ungaze ube ufundile akula msebenzi ongawuthola kodwa into ekhona yikuthi ukufunda kuhle njalo nxa ufundile labantu bayakuhlonipha.
Ukubeka izifundo zakho phambili kwakho konke okunye okwenzayo kwenza ubelekusasa elihle.
Lanxa kunzima ukuthi imisebenzi itholakale abantwana kabaqakathekise isikolo bafunde baze bayefika emayunivesithi bekele ukudlala.
