uMthunywa
Thokozile Mbedzi
BASELE bedidekile futhi bethithibele abafundi besikolo seKenjobo Primary School eBinga kulandela ukukhanda umbalisi wabo edlwengula omunye wabo endlini yakhe.
Indaba le ivele kuviki ephelileyo kulandela ukuba umzawakhe kamamangala ebikele uyisekazi ngokwehlele omunye wakhe, okubangele ukuthi umbalisi ogangileyo lo abotshwe.
Umbalisi lo, uKelias Munkombwe oleminyaka engu-48 wesiqintini seMweba, eSiansundu, esigabeni seBinga ngaphansi kwenduna uSaba udlwengule umfundi okuGrade 7, esingeke saqamba igama lakhe ngenhlonso yokumvikela.
Ekhuluma lentatheli kaMthunywa ulnspector Glory Banda uthe babophe umbalisi ngemva kokuthola umbiko wokuba udlwengule umfundi.
“Samukele umbiko wokuba umbalisi uMunkombwe wadala icala leli nyakenye mhlaka 3 Mpalakazi ekuseni.
“Wathuma umfundi lo ukuthi ayethatha amabhuku endlini yakhe andubana amlandele afike ambambe iganyavu. Uthe elokhu esenza isenzo lesi kwathutsha abanye abafundi bafika bavula umnyango bengaqoqodanga bathi bethi mehlo suka bathola inkemenkeme le,” kulandisa uInsp Banda.
Kubikwa abafundi bahamba bayabikela umgcinisihlalo weSchool Development Committee uMnumzana Timothy Muleya wabuza umfundi ohlukuluziweyo ngakho kodwa kazange abikele amapholisa ngodaba lolu.
Udaba lolu luze lwavela egcekeni mhlaka ka 10 Nhlolanja lapho umzawakhe kamamangala esebikela unina kamamangala ngehlakalo lesi.
Unina kamamangala kazange aphozise amaseko kodwa wahle wayabikela amapholisa ngalo okwenza umfundi wayahlolwa esibhedlela, kwasekubotshwa umbalisi.
“Amapholisa aqhubekela phambili ngokuphenyisisa ngodaba lolu,” kuphetha ulnsp Banda.
