uMthunywa
Ethel Ncube
KUSIGA esihlasimulisa umzimba kulendoda eleminyaka engu-57 yeMagwegwe North koBulawayo ekhandwe idlwengula umzukulu wayo andubana kuvele ukuthi isileminyaka emithathu isenza lokhu.
Kuzwakale ukuba kusukela umamangala eqala uGrade 1 eleminyaka eyisithupha umalumakhe esingeke sachaza igama lakhe ngenhloso yokuvikela umamangala ubemhlukuluza kuze kufike khathesi lapho asesenza uGrade 3 khona.
Isenzo sikamalume lo sivele ngempelaviki ngesikhathi umnewabo kamamangala athe evela khelela umagwebu wathi edlula ekamelweni lomnawakhe wezwa kulomsindo walunguza ngefasiteli wabona umalumakhe ehlukuluza umnawakhe ngo 11 ebusuku.UMthunywa uxhumane lesinye isakhamuzi esichaze ukuba umalume lo ubengaqalisi isenzo sakhe lesi.
Assistant Inspector Nomalanga Msebele
“Ubaba lo kukhanya ubengaqalisi ukuhlukuluza umzukulu wakhe ngoba umntwana uthe ebuzwa wachaza ukuthi waqala ukuhlukuluzwa ekuGrade 1 kwaze kwaba khathesi.
Okutsho ukuthi useleminyaka emithathu edlwengula umzukulu wakhe. Umnewabo womntwana lo wabiza omakhelwane ukuthi bazombonisa umhlolo lo, bamthola elokhu ebhunyumunyu ekamelweni lomntwana,” kuchaza umakhelwane lo othande ukwaziwa ngokuthi nguMaDube nje kuphela.
Isikhulumi samapholisa koBulwayo uAssistant Inspector Nomalanga Msebele uveze ukuba udaba olunjalo sebelwamukele. “Indaba enjalo isisezandleni zamapholisa sikhuthaza uzulu ukuba angatshiyi abantwana abangamankazana lezihlobo ezingamadoda,” kuphetha uInsp Msebele.
