uMthunywa
Thokozile Mbedzi
ZILOKHU zikhakhamele izakhamizi zeTarusenga, eMasvingo ngemva kokuba elinye inina litshontshele umakhelwane walo usana olulenyanga ezine.
Kubikwa uTariro Mahoshora oleminyaka engu-30 utshontshele uPrisca Chime oleminyaka engu-22 usana lwakhe olulenyanga ezine mhlaka 4 Mfumfu ngehola lika-9 ekuseni.
Kuzwakale ukuthi uMahoshora wayethi nxa ebuzwa ngabantu ukuthi umntwana alaye ngokabani njengoba wayekhala kodwa engamunyisi athi ngowakhe njalo owesilisa ayehamba laye ngumkakhe okwakusenza abantu bangabi lendaba lakho.
Ekhuluma lentatheli kaMthunywa Maria Moyo uthe bahlukumezekile ngokutshontshwa okwenziwa usane lolu.
“Sihlukumezekile silapha ngokutshontshwa okwenziwe umntwana, okubuhlungu yikuthi uTariro ngumakhelwane ngakho wayehlala ehamba koPrisca afike adlale losane engathi uyaluthanda.
“Kungakho uPrisca ubemthatha njengomakhelwane kanti uyisigangi wenzela ukumlalisa ingqondo amtshontshele umntwana,” uNkszn Moyo.
Uthe ngalelolanga uMahoshora wafika kuPrisca njengansuku zonke lapho ayefika adlale lomntwana ambelethe.
“Mhlalokho wathi esebelethe usane wathi usake elule inyawo bayefika esilindelweni samabhasi kodwa wahle wadliwa ngumswenya. UPrisca wamangala sokusemini enkulu, ilanga latshona waseqala ukuphaphatheka esedinga usane lwakhe.
“Kukhanya wayethi nxa ehlangana labantu athi umntwana ngowakhe njalo uhamba loyise okuveza ukuba bancedisana lowesilisa lowo ukutshontsha usane,” kulandisa uNkszn Moyo.
Udaba lolu lubikelwe amapholisa alokhu edinga umkhondo wokuthi uMahoshora watshona ngaphi.
Isikhulumi samapholisa esabelweni seMasvingo uInspector Kudakwashe Dewa ebuzwa ngodaba lolu uvumile wathi solufikile ehofisini yabo njalo basaluphenyisisa.
“Udaba losane olutshontshwe ngumakhelwane solufikile ehofisini yethu ngakho sisaluphenyisisa.
“Sicela uzulu ongaba lolwazi azise amapholisa aseduze laye ngokutshaya ucingo,” kuphetha uInsp Dewa.
