uMthunywa
Ethel Ncube
KWEHLE iyezi elimnyama kwenye imuli yeKwekwe ngemva kokuba umama lobaba bomuzi behlahlelwe ngehloka endlini yabo ngumakanika okubikwa wathi eqeda ukubabulala wathatha imota yabo kanye lomakhalekhukhwini wadliwa ngumswenya.
UCollins Jongwe oleminyaka engu-34 kubikwa wahlalela uKenneth Chirashi lomkakhe uLorna Chirashi.
Wabotshwa ngamapholisa eseseGokwe ehamba ngemota yaboChirashi.
Ngokutsho kwesitatimende samapholisa, ukuze icala lokubulala leli livele kubikwa uMike Chirashi oyindodana yababuleweyo wafonela uyise, umakhalekhukhwini waphendulwa ngamapholisa ambikela ukuthi abophe enye indoda ayithole ilesithupha sika Kenneth Chirashi kanye lomakhalekhukhwini wakhe.
Bambikela njalo ukuthi umsolwa wayetshayela imota yohlobo lwe Mercedes Benz eyi-silver njalo ama-number plates emota bawafica efihliwe emoteni.
Lokhu kwamkhathaza uMike wasefonela umakhelwane uLamulani Sithole wathi ayekhangela abazali bakhe endlini.
Umakhelwane kazange aphozise amaseko wahle wayakhangela emzini waboChirashi wathola izindlu zonke zikhiyiwe. Wabiza amapholisa afika alunguza kufasitela yendlini yokugezela abona umuntu ethe daca phansi.
Amapholisa abulala isivalo angena athola ubaba wasekhaya ehlahlelwe esiphaqeni wabotshwa intamo ngentambo.
UNkosikazi wakhe watholakala endlini yokugezela efile eganyulwe ikhanda kane.
Amapholisa abuza omunye umakhelwane ukuba kungabe kukhona akubonileyo, waveza ukuba wezwa umsindo womuntu ehlaba umkhosi ngemva kwesikhatshana wabona umakanika uCollins Jongwe esephuma etshayela imota kamuyi iToyota Hilux.
Intatheli ixhumane lesikhulumi samapholisa koBulawayo obike ukuba indaba enjalo yenzakala,
UCollins Jongwe usezandleni zamapholisa njalo usiza amapholisa ukucwayisisa ngaloludaba,” kuphetha uInsp Mahoko
