uMthunywa
Cornelius Luphahla
BHUU, bhuu, bhuuuu!
Ungezwa indwangu ibhonga kanje, baleka.
Zisamangele izakhamizi zesiqintini seNdwangu Line, eFilabusi ngemva kokuba enye indoda yakule indawo ilunywe yindwangu ingalo yaze yathwalelwa esibhedlela.
Isiga lesi senzakale ngeSonto kuyonale iviki lapho uMnumzana Mongi Odilo Mathuthu (33) alunywe khona yindwangu ngesikhathi ezama ukuyitshaya ngelitshe.
Kubikwa indwangu le ibisihluphile kule indawo nanko phela ibisidla amazinyane kanye lenkukhu okudale ukuthi izakhamizi zibophe iqhinga lokuyibulala.
UMthunywa uxhumane loMnumzana Tapiwa Kapungu ongumzukulu kaMnu Mathuthu walandisa ngendaba le ethi kakaze akubone lokhu.
“Lokhe ngathwetshulwa yingwe kangikaze ngizwe kuthiwa indwangu iyaluma umuntu ngakho ngangiqala ukukubona. Indwangu le ibisithwalise nzima izakhamizi ngokudla imbuzi lenkukhu njalo bekunzima ukuthi ibonakale njengoba ibihamba yodwa. Ngalokhu yathutsha labanye abafana kusekuseni bayinikela ngezinja yaquma ngakithi sasesibalandela lomalume.
“Sithe siphambili yama yaqalisa ukuluma izinja uMathuthu wasezama ukudobha ilitshe ukuthi ayitshaye yahle yamluma ingalo walimala. Samlamulela kwathutsha ezinye izakhamizi zasincedisa sayibulala indwangu le sasesimthwalela esibhedlela seFilabusi,” kuchaza uMnu Kapungu.
Ebuzwa ngale indaba uMnu Mathuthu uvumile ukuthi kuliqiniso ukuthi indwangu yamluma wathi usizwe yisibhedlela njalo wayengazi ukuthi indwangu iyaluma umuntu.
“Kuliqiniso sibili ukuthi ngalunywa yindwangu ingalo kodwa indaba le iyangimangalisa kakhulu ngoba ngangingazi ukuthi indwangu iyaluma umuntu.
“Indwangu le yangiluma ngizama ukudobha ilitshe lokuthi ngiyitshaye ngesikhathi ilwisana lezinja. Ngalokhu ngisizwe yisibhedlela ngoba bangithunge izitisthi eziyisithupha engalweni,” kutsho uMnu Mathuthu.
UMnumzana Simon Sibanda ongusiyazi kwezamasiko ebuzwa ngendaba le uthe akukaze kwenzakale lokhu njalo kukhona okuzamvelela olunyiweyo.
“Indaba yendwangu elume umuntu iyisimanga esikhulu kimi ngoba akukaze kwenzakale lokhu. Ngokunjalo kukhona okukhulu okuzamvelela lo olunyiweyo ngoba kungenzakala ukuthi abe ehlungwe ngabantu,” kuphetha uMnu Sibanda.
