uMthunywa
Lynnia Ndlovu
KULENDODA yeVumbachigwe Mine engqathulwe indebe yangaphansi lisotsha elisebenzela eKwekwe kubangwa ukuthengelana umhlanga wegwayi.
UJonathan Ncube (27) ongumtshayeli wezimota ubikele amapholisa eGuyu ukuthi mhlaka 9 kuNtulikazi uRoyal Ndlovu olisotsha wamtshaya wamkhumula amazinyo andubana amngqathule indebe.
Kubikwa uNcube watshaywa ngumsolwa ngezibhakela waze waqaleka waphaphama engaselamazinyo amabili.
Umsolwa ubemiswe phambi kukamantshi uArrafat Kozanai kuviki ephelileyo njalo ulalile icala abeletheswa.
Umsolwa uthe uNcube wamthuma ukuthi ayemthengela imihlanga yegwayi emihlanu kodwa wala okwenza wamtshaya ngamampama amabili esihlathini.
“UJonathan Ncube sihlangane ebhawa yaseChelesa wangithuma ukuba ngiyemthengela imhlanga yegwayi emihlanu mina ngala, wasengitshaya ngamampama ethi ngiyamdelela mina ngingumfana omncane.
“Lokhu kwangikhuba kungakho saqala ukulwa ngoba wayesengiluma emlenzeni okwenza ngacina ngimtshaya ngezibhakela wacina ephuma amazinyo aphambili.
“Ngaphinda ngamluma ngamngqathula indebe,” kutsho umsolwa.
UNcube ebuzwa ukuthi kwenzakalani ngalelolanga ubikele inkundla ukuthi yena kakwazi ngoba wake waqaleka.
“Nkosi angikwazi ukuthi kungabe kwenzakalani ngoba ngake ngaqaleka ngaphaphama ngingaselandebe yangaphansi.
“Ngaphinda ngananzelela futhi ukuthi lamazinyo ami amabili aphambili ayesephumile,” kutsho uNcube.
Umantshi uKozanai unqume ukuthi umsolwa kalacala ngoba wayezivikela njengoba babesilwa.
