uMthunywa
INHLANGANISO yeNational Aids Council (Nac) isinanzelele ukuthi abantu abanengi bomele ulwazi mayelana le-Post-Exposure Prophylaxis (PEP). Kubalulekile kakhulu ukuthi wonke umuntu azwisise ukuthi kuyini iPEP.
I-Post-exposure prophylaxis (kumbe PEP) kutsho ukunatha amaphilisi ama- antiretroviral (ARVs) masinyane ngemva kokuba sengozini yokuthelelwa igcikwane leHIV.
Amaphilisi la athengwa kuphela nxa uwabhalelwe ngudokotela.
Ukuze asebenze ngobuqotho kumele uqalise ukuwanatha kungakedluli amahola angu-72 ubesengozini yokuthi igcikwane lingabe lingene emzimbeni wakho.
Kulendlela ezehlukeneyo ezinengi lapho umuntu angaba sengozini yokuthelelwa igcikwane leHIV.
Phakathi kwazo kulengozi zomgwaqo kanye lokudlwengulwa loba ukusebenzisa ijekiseni yinye nxa lisebenzisa izidakamizwa.
Abanye kungaba yikuthi umuntu ahlangane laye emacansini engazivikelanga uphila legcikwane leHIV.
Omongikazi, odokotela kanye labososayensi abasebenza labantu abaphila leHIV labo bangaba sengozini yokuba legcikwane ngokubamba igazi kumbe impahla elegcikwane ngesikhathi besenza umsebenzi wabo. Laba-ke labo bayayidinga iPEP yemsebenzini.
Igama elithi prophylaxis litsho ukuvikela umkhuhlane. Ngaphambi kokunikwa iPEP kumele uhlolelwe igcikwane leHIV ukuze kwaziwe isimo sakho.
I-prophylaxis le yenziwe ngemithi elwa legcikwane leHIV njalo kumele anathwe okwamalanga angu-28.
Udokotela kumele aqume ukuthi yiwuphi umuthi okufaneleyo kusiya ngokuthi ungabe utheleleke njani igcikwane leHIV. I-PEP ilungile lanxa bekhona abangaba lempumela embi yokusebenzisa amaphilisi la.
Loba yiphi impumela ebakhona ilakho ukwelatshwa njalo kayifaki impilo yomuntu engozini.
Khumbula ukuthi iPEP kumele isetshenziswe kuphela ezimweni ezingavamanga ngemva kokuba sengozini yokuthelelwa iHIV.
Ngeke ime esikhundleni sezinye indlela zokuvikela ukuthelelwa igcikwane leHIV, efana lokusebenzisa ngendlela eqondileyo ikhondomu kanye le-sterile injection.
Ngenxa yokubandlululwa kodlwenguliweyo loba obhinyiweyo, inengi lalabo abahlukuluzwayo kubanzima ukuthi bachaze ukuthi bahlukuluziwe kungakho-ke bayekela ukuyathatha iPEP.
Abanye bayesaba ukunyeywa lokuhlekwa ukuthi banatha amaARVs kungakho bayekela ukunatha iPEP, bacine befaka impilo zabo engozini. Kubalulekile ukuhlolelwa igcikwane leHIV njalo lokuthi wazi isimo sakho.
INac kanye labanye abasebenza layo baqhubeka besola labo ababandlulula labo abaphila legcikwane leHIV eZimbabwe kanye lalabo abahlukuluziweyo. Izisebenzi zempilakahle kufanele zibe lomkhuba wokufuna impilo kanye lokuthi belatshwe nxa kudingeka.
Vakatshela ikilinika loba isibhedlela esiseduzane lawe ngemva kokuba sengozini yokuthelelwa igcikwane leHIV ukuze unikwe iPEP. Khumbula ukunatha amaphilisi akho ngendlela olaywe ngayo ngabezempilakahle.
Kusenjalo, iPEP kumele isetshenziswe kuphela kuzimo zokutheleleka igcikwane, kungaba yikuba sengozini yomgwaqo loba ukuhlukuluzwa. Ngeke ifakwe esikhundleni sezinye indlela zokuzivikela kugcikwane. Sebenzisa amakhondomu ngendlela eqondileyo, zikhathi zonke njalo thandana lomuntu oyedwa othembekileyo.
INac ikhuthaza umuntu wonke ukuthi ahlolwe igcikwane leHIV kuthi labo abangena emacansini kumele bahlale besiyahlolwa.
