uMthunywa
YiNtatheli kaMthunywa
UKUZE uqinisekise ukuthi isilimo osilimayo esivandeni singesezinga laphezulu, kumele usivune sesikhule kuhle, usiphathe ngonanzelelo uphinde usigcine endaweni elezimo eziqondileyo. Imbhida loba isikhiwe iyaqhubeka ngempilo yayo yikho ibonakala amahlamvu echelesile.
Nxa imbhida isikhulile ngesikhathi ikhiwa kumele imiswe ngokuyifaka kumaqandisa. Ezinye izilimo ezifana lamatamatisi angakhiwa eseseluhlaza, abekwe endaweni ekhudumalayo ukuze avuthwe masinya. Ngaphandle kokuvuthwa, ukugcina akuguquli uhlonzi lwesilimo. Kungaba nzima ukwazi ukuthi izilimo zesivandeni sezikuzinga lohlonzi lwaphezulu. Okokuqala okumele ukwenze yikuba kwazi ukuthi wasilima nini leso silimo.
Loba ezinye izilimo zingaba sengozini yokulimala ngesikhathi zivunwa kulezinye, zama ukuthi zingabi lamanxeba ngesikhathi uziphatha nje zonke. Lahla zonke izilimo ezilezibonakaliso zokubola ukuze zingaze zaphambanisa ezinye. Ezinye izilimo kumele zigeziswe ngamanzi aqandayo futhi agelezayo zisanda kuvunwa ukuze kususwe inhlabathi, uthuli kunye lokunye okungaziphambanisa.
Amasu amathathu okuvikela uhlonzi lwesivuno sakho abalisa izinga lokutshisa, ubumanzi kanye lomoya. Izixwayiso ngezilimo ezingasiza ukuthi ube lesivuno esilohlonzi. Indumba (green beans): zivune zingakabi lombala oluthuli njalo labantwana abakhulu. Gcina indumba lezi ziqanda njalo zilobumanzi futhi uzisebenzise ngokuphangisa.
Ikhabitshi: Vuna ikhabitshi ikhanda seliqinile. Amahlamvu angaphandle kumele abe selombala ofananayo oluhlaza kumbe oyibubende (kusiya ngomhlobo). Amanzi angaba manengi acina ebangela ukuthi izilimo ezifana lalezi zidabuke. Gcina ikhabitshi evuniweyo lapho okuhlala khona izithelo njalo uyisebenzise kungakapheli amaviki amabili.
Imiqwente: Iyabe isilungele ukuvunwa nxa isemincane njalo ilamanzi. Ungayekeli idlule i-2,5cm ububanzi. Suphuna imiqwente emikhulu kuqala emfolweni. Khipha amahlamvu uyigezise ungakayifaki efirijini.
Amagwili: Kumele avunwe eselobubanzi obuphakathi kwe-5 le7cm kodwa kuya ngokuthi wena njengomlimi uthanda enganani. Yekela amagwili awome kuqala esivandeni ngemva kokuwagebha. Ungawekeli kodwa atshiswe lilanga kakhulu. Susa inhlabathi kodwa ungawagezisi nxa usuwabeka. Gcina amagwili endaweni eqandelelayo njalo ewomileyo.
