uMthunywa
Loice Msimanga
INGCITSHI kweze-horticulture kunhlanganiso ye-Agritex isilimukise abalimi abalesifiso sokulima amakhowa ohlobo lwama -oyster ukuze bazitholele inzuzo enhle.
UNkosazana Treggy Mpofu uxwayise abalimi ngendlela yokulima amakhowa abizwa ngokuthi ngama-oyster.
“Umhlobo wama-oyster mutsha lapha eZimbabwe kodwa abalimi kukhanya bekuthakazelela ukuwalima ngoba kawulandleko ezinengi futhi ulula ukulima,” kutsho uNkszn Mpofu.
Uqhubekele phambili esithi umlimi nxa ezalima amakhowa kumele akhe indlu lapho azawahlanyela khona.
“Indlu yamakhowa yakhiwa ngezitina kumbe ngezigodo lodaka ifulelwe ngotshani, amaphepha epulastiki angasetshenziswa ukuvala isikhala endlini ukwenzela ukuthi kwengezeleleke ubumanzi phakathi.
“Izikhala zokungenisa umoya kumbe amafasitela kuyafuneka kodwa kumele kubephezulu ukwenzela ukungenisa umoya lelanga ukuze amakhowa akhule kuhle.
“Umlimi kumele akhe ingalane yokuphathela kumbe eyokulengisa amasaka. Indlu yamakhowa kumele ibe lesikhudumezi esizenelisa ukuzalisa amakhowa. Ukutshisa kumele kube phakathi kwe-18 kusiya ku-25 degrees Celsius. Kukanti ubumanzi bona kumele bube phakathi kwe80% kusiya ku-95%,” kutsho uNkszn Mpofu.
Uthe lapho okulinywa khona amakhowa akufuneki ukukhanya ukuze amile masinyane.
“Amafasitela kunye lezikhala kumele kuvalwe kube mnyama. Ukukhanya akufuneki kuthi ukutshisa phakathi kumele kube yi-24 degrees Celsius.
Uthe abalimi kumele bathenge inhlanyelo yamakhowa endaweni eziqondileyo.
“Inhlanyelo elohlonzi itholakala lapho okucubungulwa ngamakhowa khona e-spawn laboratories. Ukuze uphumelele emsebenzini wokulima amakhowa kuqakathekile ukuthi usebenzisa inhlanyelo ehloliweyo.
“Inhlanyelo yamakhowa imiliselwa emahlangeni amabele, e-barley loba ingqoloyi. Okunye okumele kunanzelelwe yikuthi amakhowa kumele ahlanyelwe endaweni ehlanzekileyo,” kuchaza uNkszn Mpofu.
Uqhubekele phambili wathi abalimi bayakhuthazwa ukuthi babulale amagcikwane ahlasela amakhowa ngokubulala amagcikwane (steriliser).
“Ukubulala amagcikwane kuqakathekile ngoba kuphungula ubudli kanye lemikhuhlane. Ungasebenzisa imbiza enkulu loba inkonxa enkulu ukufakela lokhu okokukhulisela amakhowa okunjengomule wengqoloyi ukuze ukubilise emanzini (100 degrees Celsius). Inkuni zingasetshenziswa ekubiliseni lokhu,” kuphetha uNkszn Mpofu.
