uMthunywa
Khanyile Ndebele
ABALIMI bemadolobheni sebexwayiswe ukulima amakhabe ngoba elenzuzo enhle ngenxa yokuba athandwa ngabantu abanengi.
UMthunywa uxoxisane lomunye umlimi wamakhabe wakoBulawayo, uMnumzana Jilly Ncube ochaze kabanzi ngokulinywa kwawo.
Uthe umlimi kumele aqale alungise insimu yakhe andubana alime amakhabe.
“Umlimi kumele aqale ngokugebha amagodi atshona okungaba yi-50cm ubusufaka umquba kumbe uCompound D engaba yi-40g.
“Igodi linye ngalinye kufanele liphoselwe intanga ezimbili,” kutsho uMnu Ncube.
Uthe emfolweni kumele amagodi ehlukaniswe nge-50cm kuthi imifolo yona yehlukane ngesibanga semitha elengxenye kusiya kumamitha amabili.
Uveze ukuthi nxa isilimo samakhabe sesimilile singavele sibe lamahlamvu amane umlimi kufanele afake i-Ammonium Nitrate (AN) eyenza isilimo sizale.
“Nxa umlimi efaka i-AN kumele ibe khatshana lesilimo nge-10cm.
“Kuthi nxa sesihlanza umlimi kufanele adinge i-20 litres athele amanzi ahlanganiswe letshukela, molasses kanye le-diathote abesefafaza ngomthanyelo ozabe ufafaza ngamathonsi amakhulu.
“Lokhu kuxotsha izibungwana ezaziwa ngokuthi yi-Fruit fly kumbe pumpkin fly. Itshukela lizasebenza ukuzikhanga ukuthi zidle konke lomuthi qede zife.
“Lo umuthi umlimi kufanele awufafaze ngehola lika-5 kusiya ku-6 ntambama lapha i-fruit fly eyandise ukusondela khona esilimweni,” kuphetha uMnu Ncube.
