uMthunywa
Langelihle Moyo
ABALIMI sebexwayiswe ukuba kumele bananzelele inhlanyelo yabo, umhlobo womhlabathi kunye lomvundiso nxa befisa ukuba lesivuno esiphezulu samagwili.
UMnumzana Thando Moyo oyingcitshi kwezokulima esabelweni seMatabeleland South uxwayise abalimi abafisa ukulima samagwili ngendlela abangazilandela nxa bewalima.
“Nginanzelela ukuthi izilimo ezinjengamagwili ziyabiza kakhulu, ikakhulu nxa sikhangele labo abalimela ukuthengisa esithi thina yi-Commercial Farming ngesiLungu. Kudingakala ukuthi umlimi abe lolwazi olugcweleyo, imali, amanzi okuthelela njalo abelezisebenzi ezeneleyo.
“Imali iyadingakala kakhulu ngoba umlimi kumele athenge imithi yokufafaza isilimo ukuze avikele imikhuhlane njalo umlimi kumele athenge imvundiso aphinde aholise izisebenzi zakhe,” kutsho umnu Moyo.
“Okuqakathekileyo okungenza umlimi alime avune amagwili alohlonzi yikuthi athenge inhlanyelo endaweni okwaziwayo ukuba zithengisa inhlanyelo elohlonzi njalo engahluphiyo ukumila.
“Nxa lingathenga inhlanyelo yamagwili engakamiliswa, liyenelisa ukuzimilisela ngokufaka intanga zamagwili kuma-trays lapho okuhlaba khona ilanga kodwa elingedluli ku-18 degrees. Kukanti nxa esehlumile selingawafaka lapho okuqandelela khona. Angamila abemade okwedlula i-25cm kuyabe sekungemva kwamaviki ayisithupha selingayawahlanyela ke emasimini enu lapho eliyabe lenze khona imibundu yenu,” kulandisa uMnu Moyo.
Ubuye wachasisa ngomhlabathi oyiwo olungele ukulinywa amagwili.
“Amagwili afuna ukulinywa emahlabathini, ongenisa umoya, hatshi esidakeni njalo afuna ukulinywa lapho azabe ethola khona ilanga mhlawumbe okwamahola ayisithupha kusiya kuhola lesitshiyagalombili. Ngilikhuthaza ukuthi ezindimeni zenu zonalezo elilima kuzo amagwili kumele lenze litshintshanisa izilimo ukuze umhlabathi ugcinakele uvundile,” kutsho uMnu Moyo.
Uthe okunye okubalulekileyo yikufaka umvundiso kusilimo samagwili.
“Umvundiso uqakathekile kakhulu kusilimo lesi kodwa ukuze wazi umvundiso okuyiwo okumele uwufake kumele uqale uhlolise umhlabathi ukuze ubone ukuthi usilela kuphi ukudla okungadingwa yisilimo.
“Amagwili enza kuhle nxa efakwe umquba lokhu kwenza umlimi angasebenzi imali enengi ethenga imvundiso),” kuphetha uMnu Moyo.
