uMthunywa
Listen Ndlovu
INKAMPANI yeFivet isixwayise abalimi mayelana lomkhuhlane wokukhwehlela ohlasela imbuzi ongaphambanisa ukukhula kwesibaya somlimi.
Fivet
Ekhuluma lentatheli uMnumzana Thandolwenkosi Dube onguTechnical Salesperson kunkampani le, ubike ukuba ukukhwehlela embuzini kuveza ukuthi ilamawemusi.
“Ukukhwehlela kwembuzi kuyabe kuveza ukuba imbuzi ihlaselwe yi-lungworm nxa indawo ehlala imbuzi ilothuli.
Umlimi engalahlekelwa kakhulu ngoba isifuyo siyabe sisehluleka ukuphefumula, singasadli, umzimba usehla lokungehlisi uchago nxa ingensikazi, okudala ukuba imbuzi icine isifa,” kutsho uDube.
“Umlimi kumele avikele imbuzi zakhe emkhuhlaneni lo ngokuqinisekisa ukuba imbuzi azihlali endaweni engahlanzekanga.
Kumele njalo lapho okuhlala khona imbuzi kungangeni amanzi ngoba ubumanzi buletha imikhuhlane.
“Umlimi kumele ananzelele njalo lapho okudla khona imbuzi zakhe, ngoba zilakho ukuthola umkhuhlane lo, emadlelweni angahlanzekanga,” kutsho uDube.
“Nxa imbuzi ilomkhuhlane lo, kumele ayedinga umuthi wokukhipha amawemusi la othiwa yi-Benzimidazole based anthelmintics awuthola ngemva kokuvakatshela odokotela bezifuyo,” kutsho uDube.
