uMthunywa
Cornelius Luphahla
INHLANGANISO ebona ngokulondolozwa kwemvelo eye-Environment Africa ikhuthaza izakhamizi endaweni ezehlukeneyo ukuba zifuye inyosi ngenhloso yokulondoloza imvelo.
Inhlanganiso le ithe ukufuya inyosi kungaphathisa kakhulu izakhamizi zemaphandleni ukulondoloza imvelo yazo ngoba endaweni ezinengi isitshabalele.
UMthunywa ukhulume loMnumzana Collen Mutasa oyingcitshi kwezokuguquka komumo womkhathi wachaza ukuthi okwenza bakhuthaze ukufuywa kwenyosi yikuthi izihlahla endaweni ezinengi sezaganyulwa ngabantu osekubangela ukugugudeka komhlabathi.
“Okwenza sikhuthaze abantu ukuthi bafuye inyosi yikuba ngomnyaka kuganyulwa izihlahla ezedlula i-300 000 njalo kabakho abahlanyela ezinye,” kutsho uMnu Mutasa.
UMnu Mutasa uqhubekele phambili njalo wachaza ukuthi ukufuywa kwenyosi kudinga izihlahla ezinengi eziluhlaza kanye lamaluba.
“Sinanzelele ukuthi abantu bengafuya inyosi kuzadingeka ukuthi bahlanyele amaluba amanengi bawathelele njalo ukuze inyosi zabo zenelise ukuthola ukudla okwenza uluju kiwo.
“Lapho okufuyelwa khona inyosi kuqakathekile ukuthi kuhlanyelwe izihlahla ezinengi ukuze zenelise ukuthola ukudla kwazo eduze.
“Ngalokhu-ke umlimi ofuye inyosi usuka ahlanyele izihlahla ezitshiyeneyo kuleyo ndawo ukuze athole uluju olunengi enyosini zakhe nxa sezithapha. Lokhu kuqakatheke kakhulu ngoba kusuka kulondoloze imvelo kuvikele lomhlabathi ukuthi ungagugudeki ngoba sokuhlanyelwe izihlahla,” kutsho uMnu Mutasa.
UMqondisi wenhlanganiso ye-Environment Africa uMnumzana Barnabas Mawire uchaze njalo ukuthi ukufuya inyosi kuyazilondoza njalo inyosi.
“Ngaphandle kokulondoloza izihlahla, ukufuya inyosi kuyalondoloza inyosi ngoba abazithaphayo bayabe bezithapha ngobunono bengazibulali kodwa labo abazithapha bengazifuyanga bayagamula izihlahla babuye njalo bazibulale besenzela ukuthapha kuhle uluju.
“Laba abafuya bayabe bezithapha ngemva kokuzidakisa bengazibulali ukuze zande zenelise ukupheka uluju olunengi,” kuphetha uMnu Mawire.
