uMthunywa
KUGQOZA ukufunda nokufundisa eVukile High School, KwaMaphumulo, okubikwa ukuthi sekuhlukenwe ngokwezinyunyana emagumbini okuhlala kuwona othitsha kubangwa izikhundla.
Ngokuthola kwenLANGA kuthiwa umbango uqale ngesikhundla esekela likathishanhloko ebesikhangisiswe okunezinsolo zokuthi kunqobe owangaphandle kulesi sikole nakuba incwadi eqinisekisa ukuqashwa kwakhe kulesi sikhundla, ungakayikhiphi umnyango wezemfundo.
Kulesi sikole kubikwa ukuthi othisha beSouth African Democratic Teachers Union (Sadtu) sebehlala bodwa nabe National Teachers Union (Natu) kube okunjalo.
Umthombo weLANGA uthi mhlaka-31 kuMay (Nhlaba), kwenziwe inhlolokhono kwabe sekuvunyelwana ngothisha wangaphandle kwalesi sikole.
South African Democratic Teachers Union
Kuvela ezithi baningi othisha bangaphakathi ebekade befake izicelo kulesi sikhundla kwabe sekuhlonzwa ababili kubona nabathathu ngaphandle.
Kuthiwa lokhu kudale uqhekeko ngaphakathi ngokwehlukana kwezinyunyana. “Sekuhlukenwe ngegumbi lokuhlala selokhu kuqale ukubhejelwa lesi sikhundla.
Othisha abafuni ukusebenza, ngoba nangesonto eledlule kuphazamisekile kwasuka umsindo abafundi befuna ukufunda, kodwa kuzanyiwe-ke kulanyulwe umsindo wezingane obufufusa,” kusho umthombo.
Elinye ilungu elihola enye yezinyunyana yothisha kule ndawo, litshele leli phephandaba ukuthi namhlanje ngoMsombuluko uzohlangana namalungu enyunyana kubukiswane lezi zinsolo.
“Kukhona esibikelwe ngakho okungahambi kahle eVukile, kodwa asifuni ukuqinisekisa ukuthi konke lokhu kubangelwa umbango walesi sikhundla.
Kuliqiniso nokuthi ngesonto eledlule isimo besingesihle emagcekeni esikole ngoba nezithunywa zethu zizifikele mathupha kodwa kwaba yisimo esilawulekayo ebesibangwa izingane ngaphakathi,” kusho ilungu.
ILANGA lithole ukuthi ziwu-11 izincwadi zomsebenzi ezingakakhishwa eziqasha othisha ezikhundleni ezikhaleni eziwu-39 ebezikhangisiwe ezikoleni ezahlukahlukene kule ndawo ngenxa yokuphonselwa inselelo kwalezi zikhala nemibango. Imizamo yokuthola isigungu sabazali bakulesi sikole ayiphumelelanga.
Okhulumela uMnyango wezeMfundo KwaZulu-Natal uMnu Kwazi Mthethwa, uthi abahambisani nokuhlukana phakathi ngemibango ephazamisa ukufunda kwabafundi. Uthi odabeni lokukhishwa kwezincwadi, kunezigaba okufunele kudlulwe kuzona ukuze kwenzeke ubulungiswa. – Ilanga.
