uMthunywa
Khanyile Ndebele
KULENTOMBI yakoBulawayo ekhulele eMakhandeni ekhuphe ingoma yayo yesine ya-mapiano ekhumbuza abantu ukuthi bazijabulise loba bedlule ebunzimeni obukhulu obulethwe ligcikwane le-Covid-19.
UDuduzile Ndlovu owaziwa ngokuthi nguLa Dee, oleminyaka engu-32 yokuzalwa ukhuphe ingoma yakhe yesine kuviki ephelileyo ethi Bhekile, ejonge ukuzothokozisa abantu njengoba bephuma kusikhathi esinzima ngesikhathi seCovid-19.
ICovid 19
Uthe okwamenza wabhala ingoma le yisifiso sakhe sokuncedisa abantu kumpilakahle yabo yengqondo ngoba banengi abantu asebehlaselwe ngumkhuhlane wengqondo ngenxa yenkinga abadlule kuzo.
“Ngicabange ukukhulula ingqondo zabantu ngengoma ya-mapiano, okungumculo otshiyene lalezo engandise ukuzipheka ezothando.
“UBhekile ufisa ukujabulisa abantu ngesikhathi esifanayo kawuhlosanga ukulibazisa abantu ngoba ubenza babe lethemba lokuthi bangasebenza nzima bazaphumelela,” kutsho uDube.
Ezinye ingoma ezakhutshwa nguLa Dee ngezithi, Ngithembele kuwe ayihlabela loLindokuhle “Lindough” Sithole omunye wabaculi beSouth Africa, enye ngethi Soka lami eyiyo eyamenza wakhethwa kumaRoil Bulawayo Arts Awards 2020 lethi Happiness eyaqeda inyanga ezinhlanu kuSkyz Metro ingenye yezingoma eziphezulu kuTop-20.
Bulawayo Arts Awards
Uthe ngesikhathi epheka ingoma le uthole usekelo kwabe-X-studio, uMzoe 7 kanye leKeaiste Films ngomsebenzi omkhulu abawenzileyo.
“Okwakuqala ngithanda ukubonga iX-studio, abenza umsebenzi oncomekayo ekuphekweni kwengoma le, uMzoe7 leKeaitse Films,” kutsho uNksz Dube.
Uphethe ngokunika abathanda ezomculo ingqobe.
“Umsebenzi wokuhlabela udinga ukuqina, ukusebenza nzima lokuzinikela, kungaba nzima kwesinye isikhathi, akula okubuya lula empilweni kodwa nxa usenza into oyithandayo njalo oyaziyo ukuthi izakuncedisa ekucineni qhubeka usebenza gadalala,” kutsho uDube.
