uMthunywa
Cornelius Luphahla
INGQUNGQUTHELA edume ngezokuhaya edabuka esigabeni seNtalale eGwanda isikhiphe idlalade elitshisayo lenkondlo ngenhloso yokuvuselela ezamasiko kanye lokujabulisa uzulu.
Ingqungquthela le, uNqindi Lerato Ndlovu uhwatshe idlalade lakhe lakuqala elithi Izibongo Zezinduna, kuviki ephelileyo kweleSouth Africa.
UMthunywa uxhumane loNqindi wathi ujonge ukuvuselela amasiko akuleli yikho ekhuphe idlalade elibonga izinduna wabuya wathi ukhuthaza uzulu ukuthi athenge amadlalade athengiswa ngokusemthethweni hatshi awobusela.
“Ngokukhipha kwami idlalade leli ngijonge ukuvuselela ezamasiko ngoba izibongo zezinduna ziqukethe imbali yesizwe kanye lamasiko. Phezulu kwalokhu ngikhuthaza uzulu ukuthi angathengi amadlalade athengiswa ngokungekho emthethweni ngoba kungangibulalela umsebenzi wami kwezokuhaya.
“Okunye njalo ngikhangelele ukuqhubeka ngijabulisa uzulu ngenkondlo zami ngokumphekela iDVD ukuze azibonele umsebenzi wami engimenzela wona,” kutsho uNqindi.
UFuture Moyo odume ngokuthi nguJamelah ongomunye wabancedise ekukhitshweni kwalelidlalade uncome kakhulu umsebenzi kaNqindi wathi ukhuthaza uzulu ukuthi amsekele ngokugcweleyo.
“Ngiyawubonga umsebenzi oyenziwe nguNqindi owokukhipha idlalade leli ngoba liphethe umlayezo omkhulu kakhulu emphakathini. Ngalokhu ngikhuthaza uzulu ukuthi awusekele umsebenzi lo awenzileyo,” kutsho uFuture Moyo.
Ekhuluma lentatheli obona ngokuthengiswa komsebenzi kaNqindi uDickens Sipho Mathe uthe ukhangelele ukuthi inkondlo zikaNqindi zitholakale lezikolo ngoba ziphethe imfundiso enkulu ngembali yesizwe.
“Ngikhangelele ukuthi inkondlo zikaNqindi zifafazwe indawo zonke zibuye njalo zitholakale ezikolo ngoba ziqukethe imfundiso enkulu kakhulu mayelana lembali yesizwe.
“Sikhangelele ukubonana labakhulu kwezemfundo ukuze bazamukele inkondlo lezi zifundiswe ezikolo kubuye njalo kube lomncintiswano ngazo ukuze abantwana benelise ukuzifunda. Ngalokhu ngikhuthaza abantu ukuthi bazamukele ngesihle inkondlo lezi ngoba ziyavuselela ubuzwe bethu njalo zichaza imbali yesizwe kanye leyezinduna zakuleli,” kuphetha uMathe.
