uMthunywa
Gladmore Ncube
KULENDODA yeFilabusi elamabhizimusi okubikwa ibisebenzisa amathambo kagogo wayo owafayo njengomuthi wokwenza ibhizimusi lihambe kuhle osekhathazwa ngumuthi wakhe lo nanko phela uselala ebona ugogo wakhe ebusuku.
UMnumzana Brendon Mlambo kubikwa indaba yamathambo kagogo wakhe le ibisimhluphe kakhulu okokuthi ucine esiyadinga usizo kumphurofethi uEmmanuel Mutumwa webandla leJohane Masowe eChishanu.
Intatheli ikhulumisane loMnu Mlambo ngaloludaba wathi uhlupheke kakhulu ngamathambo la yikho nje ekhethe ukuthi ayebona umphurofethi ukuthi amsize.
“Ebhizimisini lethu leli lemigodi yokwemba igolide kusetshenziswa imithi kakhulu ngakho-ke lami ngangidinga ukuthi ngiziqinise ukuze ibhizimusi lami lihambe kuhle.
“Ngokuziqinisa kwami ngahamba enyangeni yangitshela ukuthi ukuze ibhizimusi lami lihambe kumele ngiyedinga amathambo kagogo owabhubhayo angilungisele wona.
“Njengomuntu owayefuna ukuphumelela emabhizimusini ngamphathela amathambo wasengipha amathathu wathi ngiwafake lapho engisebenzela khona.
“Njengokutsho kwakhe ibhizimusi lahamba kuhle sibili okweminyaka eyisikhombisa kwaze kwaqala ukungihlupha nyakenye lapho ebesengilala ngibona ugogo engikhomba ngomunwe njalo egcwele inyembezi emehlweni akhe,” kuchaza uMnu Mlambo.
UMnu Mlambo uqhubekele phambili wathi ukuhamba kwakhe kumphurofethi Mutuma kumsize kakhulu ngoba ubutholile ubuthongo obumnandi kunsukwana ezedluleyo.
“Sengilokuthula njalo ngemva kokuthola usizo kuMutumwa. Khathesi sengizakwenza ibhizimusi lami kuhle ngendlela engasoze ingihluphe, sengizasebenza loNkulunkulu,” kuphetha uMnu Mlambo.
Intatheli ikhulumisane njalo loMphurofethi uMutumwa ngaloludaba obikele intatheli ukuthi vele imali elomuthi phakathi iphetha ngobubi sibili.
“Kambe sibili nxa ungenza imali ngamathambo omuntu owafayo uyabe ucabanga ukuthi kuzaphetha ngani? Ibhizimusi yomuthi ayilunganga yikho nje uMnu Mlambo ngimkhulekele ukuthi athole ukuthula emoyeni wakhe.
“Umuntu owamphambaniselayo yinyanga le eyathi abuye lamathambo kagogo ngoba wamupha amanye watshontsha amanye wawasebenzisa ekugangeni kwakhe.
“Yikho nje umuntu lo owabhubhayo ubehlala embona ebihla ezimathonsi emkhomba ngomunwe ngoba ubesizwa ubuhlungu ukuthi amathambo akhe asetshenziswa ngendlela engayisiyo.
“Usezaphila kuhle kodwa ngikhuthaza osomabhizimisi ukuthi bangasebenzisi imithi,” kuphetha uMutumwa.
