uMthunywa
Cornelius Luphahla
KULENDODA ehlala elokitshini leCowdray Park koBulawayo ebhuqe elinye inina kabuhlungu kubangwa utshwala okudale ukuthi ihlawuliswe ngesitofu.
Indaba le yenzakale ngoMvulo kuyonale iviki lapho uPeter Dube atshaye khona uNkosazana Dzidzayi Tsuro bebanga ukuthi umncitshe utshwala ngemva kwalokho umka Nkszn Tsuro, uMnumzana Taurai Sibanda wacela ukuhlawulwa nge-two plate stove.
UMthunywa ukhulumisane lesinye isakhamuzi sakulelilokitshi esithande ukuvezwa ngokuthi nguMaNdlovu nje kuphela wachaza ukuthi uMnu Dube watshaya uTsuro kubangwa utshwala.
“Mina ngangikhona mhla uDube etshaya uMaTsuro ethi kungani emncitsha utshwala. UDube watshiya imali yama-scud amathathu kuMaTsuro njengoba kunguye owayethengisa etshabhini mhlalokhu.
Kwathi ngemva kokuba uDube esethethe utshwala bakhe bonke wabuyela wathi imali yakhe kayikapheli kusele eyama-scud amathathu.
“UMaTsuro wala ukumnika ama-scud lawo okwadala ukuthi uDube amsukele ngogodo kwaze kwalamula abantu esasinatha labo utshwala,” kutsho uNkszn Ndlovu.
UNkszn Ndlovu uqhubekele phambili njalo waveza ukuba ngemva kokuzwa ngalimpi eyavuswa butshwala uMnu Sibanda wathi uDube akhethe phakathi kokumhlawula lokumbophisa wasekhetha ukuhlawula ngesitofu.
“Kwathi ngemva kokuba uDube etshaye umkaSibanda ngogodo uSibanda wathi kakhethe phakathi kokuhlawula imali engange $20 lokubotshiswa abuye njalo angasanathi etshabhini yakhe futhi, uDube wakhetha ukuhlawuliswa ngoba kuviki ephelileyo uke wabotshelwa ukutshaya umuntu waphuma ngemva kokuhlawula.
“Ngenxa yokuthi uDube wayengelayo imali yokuhlawula wacela ukuthi ahlawule ngesitofu labantu bamncengela kuSibanda waze wavuma, yikho-ke wabhadala ngesitofu,” kulandisa uNkzn Ndlovu.
Ebuzwa ngale indaba uMnumzana Peter Dube uvumile ukuthi yenzakele wachaza ukuthi sebekhulumisene.
“UmkaSibanda ngamtshaya sibili kodwa ngangidakiwe ngakho kangikwazi ukuthi kwahamba njani.
“Noma kunjalo sakhulumisana lomkakhe ngambhadala kodwa ngeke ngibikele muntu ukuthi ngabhadala ngani,” kuphetha uMnu Dube.
