uMthunywa
Ethel Ncube
KULOMFUNDISI webandla le-Apostle Living with Hope Ministries ogwetshwe ukuyapika ejele inyanga ezingu-30 kulandela ukutholakala elecala lokuqila esinye isihlobo sakhe imali engangeRTGs$34 100 ethi uyasidingela umsebenzi.
Umsolwa uChristopher Mudawarima oleminyaka engu-42 yokuzalwa umiswe phambi komthethwandaba weZvishavane ngeviki ephelileyo esolwa ngecala lobuqili.Kubikwa uMudawarima wathatha i$34 100 yesihlobo sakhe, uNgonidzashe Mandeya oleminyaka engu-32 yokuzalwa wathembisa ukumdingela umsebenzi kwenye inkampani egebha igolide.
Kubikwa imali leyo wathi yiyo azayisebenzisa ukubhadala lapho azamtholela khona umsebenzi ukuze kulungiswe incwadi zomsebenzi.
Umtshutshisi uHilda Sibanda ubikele inkundla ukuthi umfundisi lo wayevakatshile ekhaya esinye isihlobo sakhe sathi sidinga umsebenzi yena wathembisa ukusincedisa kodwa wathi kufuneka i$23 300 wayikhupha kwathi sokuhlale isikhathi wathi kalethe enye i$10 800 wayithumela kuthe ngemva kwesikhathi wathi sokufuneka iUS$40 wayithumela njalo.
Kubikwa ngemva kwesikhathi umamangala wathi esefonela umfundisi wayengasaphenduli ucingo lwakhe okuyikho okwabangela ukuthi acine esiyabikela amapholisa.
Umantshi uNkosazana uEvia Matura uthe uMudawarima akwenzayo kulicala kungakho unqume ukuthi ayepika ejele inyanga ezingamatshumi amathathu ukuze engaphindi adale icala elifanayo.
