uMthunywa
Ethel Ncube
KULENDODA yeNyathi esele ibonga amadlozi akwabo ngemva kokuba ihlaselwe ngamadoda ayisificaminwe mibili ayibhaxabula ngezigodo andubana bayigwaze isiphaqa ngomkhonto bayitshiya isesimeni esibi.
Indaba le yenzakale ngeviki ephelileyo lapho umamangala ahlaselwe lixuku lamadoda lamgwaza andubana limtshiye ethe daca ephakathi kwechibi legazi.
Kuvele ukuba umamangala wahlaselwa ngamadoda ayisificaminwe mibili ngezigodo omunye wathatha umkhonto wamgwaza esiphaqeni abanye laba bephethe belokhu bembhaxabula ngezigodo umzimba wonke loba kungasatholakalanga isizatho sabo sokwenza lokhu.
Kubikwa umamangala waze wancedwa ngesinye isihambi esasisedlula esagijima sayabikela amapholisa kwabotshwa umetheswacala oyedwa uEmmanuel Khumalo.
UMthunywa uxhumane lesikhulumi samapholisa eMatabeleland North uInspector Glory Banda obike ukuba udaba olunjalo balwamukele.
“Sicubungula udaba lwendoda eyagwazwa ngomkhonto esiphaqeni. Sicela uzulu ukuba asincedisa sibophe abantu laba abalandelayo Adonis, Mdu, Nkosi, Trymore loLikhwa. Sithanda ukukhuthaza uzulu ukuba nxa ethe waba lengxabano angayiqedi ngokulwa kodwa bayilungisise ngokukhulumisana,” kuphetha uInsp Banda.
